మా ఆయనతో ఉంటే.. కొలీగ్ గుర్తొస్తున్నాడు

ప్రశ్న: 11 ఏళ్ల క్రితం నా వివాహమైంది. నా భర్తతో పాటు నేనూ కూడా ఉన్నత స్థాయి ఉద్యోగం చేస్తున్నాం. మాకు ఇద్దరు పిల్లలు. మా దంపతుల మధ్య ఎలాంటి సమస్యా లేదు అన్ని రకాలుగా మేము సంతోషంగా ఉన్నాం. కానీ.. నేను నా కొలీగ్‌ పట్ల ఆకర్షితురాలవుతున్నా. రెండేళ్ల క్రితమే ఈ కొత్త ఉద్యోగంలో చేరాను. అప్పటి నుంచి నాలో ఈ భావన ఉన్నా.. తను మాత్రం నాపైన ఆ ఉద్దేశంతో లేడు. అందరితో కలివిడిగా ఉండే మనిషి. ఇటీవల తన వ్యక్తిగత జీవితం గురించి రెండు సార్లు నాతో కొన్ని విషయాలను పంచుకున్నాడు. ఆ మాటలను బట్టి చూస్తే.. భార్యతో అతను సంతోషంగా లేనట్లు నాకు అనిపించింది. అతడ్ని మరిచిపోవాలని నేను అనుకుంటున్నాను. కానీ.. ప్రతిరోజు మేము ఇద్దరం కలుస్తున్నాం. అతను నాతో సరదాగా ఉంటున్నాడు. దీంతో అతడ్ని మరిచిపోకపోగా.. మరింత ఎక్కువగా ఆలోచిస్తున్నాను. ఎంతలా అంటే మా ఆయనతో ఉన్నా.. అతని గురించే కలలు. ఈ ఆలోచల్ని మానుకునేదెలా..? దయచేసి సలహా ఇవ్వండి- పేరు రాయలేదు.

జవాబు: సాధారణంగా మహిళలకి మాజీ బాయ్‌ఫ్రెండ్, కొలీగ్ గురించి పాంటసీ ఆలోచనలు వస్తుంటాయి. ఎందుకంటే వారితో ప్రత్యేక అనుబంధం ఉంటుంది కాబట్టి. ఇక్కడ కొలీగ్‌పై మీరు ఆకర్షితులవుతున్నట్లు రాశారు. వాస్తవంగా చెప్పాలంటే ఇది జరిగితే బాగుండు అనే ఆలోచనలో మీరు ఉన్నట్లున్నారు. అందుకే అవే కలల రూపంలో వస్తున్నాయోమో..? అయితే వచ్చే కలలన్నీ నిజం కావాలని లేదు కదా. ఎక్కువ మందికి తమ పాంటసీ ఆలోచనల్ని నియంత్రించుకునే సామర్థ్యం ఉంటుంది. అయితే.. మనకి నిజంగా ఆ ఆలోచన ఉన్నప్పుడు మాత్రం.. ఇవి ఆ తప్పు చేసేందుకు ఉపకరిస్తాయి. కాబట్టి మీరు పాంటసీ ఆలోచనల్ని వేరే అంశంపైకి మళ్లించండి. ఖాళీగా ఉండకుండా ఏదో పని చేయడానికి ప్రయత్నించండి. ఒకవేళ అలాంటి ఆలోచనలు వస్తున్నాయని అనిపిస్తే.. మీ భర్తతో మీరు గడిపిన ఆనంద క్షణాల్ని గుర్తుచేసుకోండి. అప్పటికీ మీ ఆలోచనలు నియంత్రణలోకి రాకపోతే.. సైకాలజిస్ట్ సలహా తీసుకోండి.

సలహా ఇచ్చినవారు- జోషి, కౌన్సిలింగ్ సైకాలజిస్ట్