అక్కడ అపరిచిత వ్యక్తితో రమిస్తే అదృష్టమట!

శృంగారం గురించి బహిరంగంగా మాట్లాడటానికే చాలా దేశాల్లో ప్రజలు ఇష్టపడరు. అలాంటిది ఓ అపరిచిత వ్యక్తితో శృంగారంలో పాల్గొనడం ఓ ఆచారమైతే? వినడానికి జుగుప్సాకరంగా ఉన్నా అలా చేస్తే అదృష్టమట. ఇండోనేసియా ప్రజలు దీన్ని బలంగా విశ్వసిస్తారు. అక్కడి జావా ద్వీపంలో ఉన్న కెముకస్ అనే పర్వతం మీద.. గునుంగ్ కెముక్ ఆలయ ప్రాంతంలో అపరిచిత వ్యక్తితో ఏకాంతంగా గడిపితే మంచి జరుగుతుందట. వ్యాపారం చేసుకునే చాలా మంది దీన్ని బలంగా నమ్ముతారు. దీని వెనుక ఓ కథ ప్రచారంలో ఉంది.

16వ శతాబ్దంలో జావా ప్రాంతాన్ని ఓ రాజు పాలించే వాడు. ఆయనకు పంగేరన్ సముద్రో అనే కుమారుడు ఉండేవాడు. ఆ రాకుమారుడికి సవతి తల్లి అయిన న్యాయి ఓంట్రోవులాన్‌తో శారీరక సంబంధం ఏర్పడింది. వారిద్దరూ సోలో అనే నగరానికి పారిపోయారు. వాళ్లు ఏకాంతంగా గడపటం చూసిన జనం రాజుకు చెప్పారు. విషయం తెలియగానే పట్టరాని కోపం వచ్చిన రాజు వారిని చంపించేశాడు.

తమ సమాధి దగ్గర ఎక్కువసార్లు శృంగారంలో పాల్గొన్న వారికి మంచి జరుగుతుందని చెప్పి ఆ రాకుమారుడు ప్రాణాలు విడిచాడట. దీంతో అప్పటి నుంచి ఇక్కడ అపరిచిత వ్యక్తులతో శారీరకంగా కలవడం మొదలైంది. ఇక్కడ 35 రోజులకు ఒకసారి చొప్పున ఏడుసార్లు శృంగారంలో పాల్గొంటే అదృష్టం తలుపు తడుతుందట. ఆ నమ్మకంతోనే చిన్న చిన్న వ్యాపారాలు చేసుకునే చాలా మంది మగాళ్లు తమ భార్యలకు చెప్పకుండా ఇక్కడికి వస్తుంటారు. ఇక్కడకు వచ్చిన మగాళ్ల వ్యాపారం అభివృద్ధి చెందుతుందో లేదో తెలియదు గానీ.. వేశ్యలకు మాత్రం లాభాల్ని తెచ్చిపెడుతోంది.