ఈ వయసులో ప్రేమ మరింత మధురం..

ప్రేమ.. రెండక్షరాల పదం మనిషిని ఉక్కిరి బిక్కిరి చేస్తుంది. ఊహల్లో విహరింపజేస్తుంది. బానిసగానూ మార్చేస్తుంది. ప్రేమ లేకుండా బతకలేం అనేంతగా మార్చేస్తుంది. జీవితాంతం నీకు తోడుగా మరో వ్యక్తి ఉంటారనే భరోసానిస్తుంది. టీనేజీలోనే మొగ్గతొడిగే ప్రేమలు కొన్నయితే.. కాలేజీ దాటాక ఆఫీస్‌లో చిగురించే ప్రేమలు మరికొన్ని. ప్రేమకు వయసు లేదు.. మనసుతోనే పనంటూ చాలా మంది ముదురు వయసు ప్రేమికులు తమ ఏజ్ కంటే ప్రేమకే ఎక్కువ ప్రాధాన్యం ఇస్తుంటారు. ఇంతకీ ఏ వయసులో ప్రేమ బావుంటుందో, ప్రేమ లక్షణాలు ఎలా ఉంటాయో తెలుసా?

20 ఏళ్ల ప్రాయంలో.. ఉత్సాహం ఉరకలేస్తుంటుంది. తొందరగా నిర్ణయాలు తీసుకుంటుంటారు. ధైర్యంగా, అలక్ష్యంగా ఉంటారు. వాస్తవాలను ఆలోచించే పరిణతి తక్కువగా ఉంటుంది. ప్రేమ అంటే మక్కువ చూపుతుంటారు. ఈ వయసులో హార్మోన్ల ప్రభావం కూడా ఎక్కువే. ఫలితంగా ప్రేమ, ఆకర్షణ దిశగా అడుగులేస్తుంటారు.

30 ఏళ్లొచ్చాక.. మానసికంగా పరిణతి వస్తుంది (కనీసం ఆశించడంలో తప్పేం లేదుగా..). ఆర్థికంగా అంతగా ఇబ్బందులేవీ ఉండవు. ఈ వయసులో ప్రేమ అంటే శారీరక ఆకర్షణకు మాత్రమే పరిమితం కాకుండా మరింత మెరుగ్గా ఆలోచిస్తారు. ప్రశాంతంగా ఉంటారు.

20లలో సెక్స్‌కే అధిక ప్రాధాన్యం ఇస్తారు. శారీరక ఆకర్షణ ఎక్కువగా ఉంటుంది. ప్రేమ కోసం ఎక్కువ సమయం కేటాయిస్తుంటారు. ఎప్పుడెప్పుడు ప్రేమిద్దామా అన్నట్టుగా ఉంటుంది. ‘ఎక్కడున్నావమ్మా.. ఓ ప్రియతమా..’ అని పాటేసుకుంటారు. తనను మర్చిపోదామన్నా ఊహూ.. మీ వల్ల కాదు.

30 ఏళ్ల వయసులో ఆలోచనా విధానంలో మార్పు వస్తుంది. శారీరక వాంఛల నుంచి మనసు అనుబంధం వైపు మళ్లుతుంది. మానసిక బంధం ఏర్పర్చుకోవాలనుకుంటారు. సెక్స్ కంటే నమ్మకమైన బంధానికే ప్రాధాన్యం ఇస్తారు. ప్రేమ అంటే తోడుగా నిలవడం, ఒకరికొకరు భరోసానివ్వడం అని గుర్తిస్తారు.

20 ఏళ్ల వయసులో ఉన్నామంటే.. డేటింగ్ దిశగా వేగంగా అడుగులేస్తుంటారు. తనతో ఎప్పుడు, ఎలా వ్యవహరించాలో తెలుసుకుంటుంటారు. ఎలా మాట్లాడాలో, ఏమేం మాట్లాడాలో.. ఇవన్నీ కాస్త కలవరానికి గురి చేస్తుంటాయి.

మూడు పదుల వయసొచ్చే సరికి డేటింగ్ అంటే ఆసక్తి తగ్గుతుంది. ఏం కావాలనే విషయమై స్పష్టత వస్తుంది. ప్రేమ గురించి స్థిరమైన నిర్ణయాలు తీసుకుంటారు. జీవితంలో మరింతగా ముందుకెళ్లేందుకు ఆలోచిస్తుంటారు.