అందమైన ప్రేమ.. ఉగ్రవాదం కంటే ఎక్కువగా!

ప్రేమ.. ఓ అందమైన పదం.. మాటలకు అందని భావన. ప్రేమలో పడితే మనల్ని మనమే మర్చిపోతాం. లవర్‌తో ముచ్చట్లతో ఊహల లోకంలో విహరిస్తాం. అదో క్రేజీ ఫీలింగ్. కానీ ఇదంతా ఓవైపే.. ఆ క్రేజీ ఫీలింగే మనల్నే కిరాతకంగా పొట్టనబెట్టుకుంటోంది. ఎంతలా అంటే ఉగ్రవాద దాడుల కంటే ఎక్కువ ప్రేమ కారణంతోనే ఎక్కువ మంది తనువు చాలించేంతగా.. ఇది ప్రేమ సాక్షిగా నిజం. 2001 నుంచి 2015 మధ్య ప్రేమ కారణంగా 38,585 మంది హత్యకు గురయ్యారు. 78,189 మంది బలవన్మరణాలకు కూడా ప్రేమే కారణం. ఇవన్నీ ప్రభుత్వ లెక్కల ప్రకారమే.

ప్రేమ వ్యవహారం నచ్చకపోవడంతో హత్య చేయడాలైతేనేమీ, పెద్దలు ఒప్పుకోవడం లేదని బలవన్మరణానికి పాల్పడటం అయితేనేమీ, నన్నే ప్రేమించనంటావా అనే కసి అయితేనేమీ.. కారణం ఏదైనా ప్రేమికులు మాత్రం ప్రాణాలను పోగొట్టుకుంటున్నారు. ఈ పదిహేనేళ్లలో ప్రేమతో సంబంధం ఉన్న 2.6 లక్షల కిడ్నాపింగ్ కేసులు కూడా నమోదయ్యాయి. అంటే మా అమ్మాయిని ఎత్తుకెళ్లాడు అని తల్లిదండ్రుల ఫిర్యాదులన్నమాట.

రోజులో సగటున ఏడు మర్డర్ కేసులు, 14 ఆత్మహత్యలు, 47 కిడ్నాప్ కేసులు.. వీటికి కారణం ప్రేమ. దేశాన్ని వణికిస్తోన్న ఉగ్రవాదం కూడా ప్రేమ చావుల ముందు దిగదుడుపే. 15 ఏళ్ల కాలంలో ఉగ్రవాదులు 20 వేల మందిని పొట్టనబెట్టుకోగా.. దాదాపు 1.20 లక్షల మంది చావులకు ప్రేమ అనే తీయని పదం కారణమైంది.

ప్రేమ మరణాల్లో ఉమ్మడి ఆంధ్రప్రదేశ్ ముందజలో ఉంది. మా అమ్మాయిని ప్రేమించడానికి నీకెన్ని గుండెలు రా అని చంపే తండ్రులు, ప్రేమలో గెలవలేమోనని భావించి భయంతో ప్రాణాలు తీసుకునే బిడియస్తులు మన దగ్గరే ఎక్కువ. మన వెనుకాలే ఉత్తరప్రదేశ్, మహారాష్ట్ర, తమిళనాడు, మధ్యప్రదేశ్ రాష్ట్రాలున్నాయి. ఒక్కో రాష్ట్రంలో 3 వేలకు తగ్గకుండా ప్రేమ చావులు నమోదయ్యాయి. వీటిలో ఎక్కువ మరణాలకు కారణం కూడు పెట్టని కులమే అనడంలో ఎలాంటి సందేహం లేదు.