పెళ్లి.. ఆరోగ్యానికి క్షేమకరం..!

పెళ్లి ఆరోగ్యానికి మంచిది... అని అంటున్నారు ఆస్టన్ వర్సిటీకి చెందిన పరిశోధకులు. పెళ్లి వల్ల మరణం దూరం అవుతుందని వీరు వివరిస్తున్నారు. వివాహానికి, ఆయష్షుకు ముడి పెడుతున్న వీరి అధ్యయనం ఆసక్తికరంగా ఉంది. హార్ట్ అటాక్, షుగర్, బీపీ వంటి కారణాల చేత మరణం దరిచేరడం పెళ్లి చేసుకున్న వారిలో తక్కువ అని వీరి అధ్యయనంలో తేలిందట.

దాదాపు పది లక్షల శాంపిల్స్ తో ఐదేళ్ల వ్యవధిలో ఈ అధ్యయనాన్ని జరిపారు. ఈ భారీ పరిశోధనతో పెళ్లి ఆరోగ్యకరం, క్షేమకరం అని లండన్ కు చెందిన ఆ వర్సిటీ పరిశోధకులు తేల్చారు. పరిశోధన ఎలా చేశారంటే.. మధుమేహం, గుండె జబ్బులు, బీపీ వంటి సమస్యలతో బాధపడుతున్న దాదాపు పదిలక్షలమంది పేషెంట్ల ఆరోగ్యస్థితి గతులను పరిగణనలోకి తీసుకున్నారు. వీరిలో పెళ్లై దాంపత్య జీవితాన్ని గడుపుతున్న వాళ్లు, సింగిల్ గా ఉంటున్న వాళ్లు ఉన్నారు.

ఐదేళ్ల వ్యవధిలో వీరి ఆరోగ్య పరిస్థితి గురించి సమీక్షించగా.. పెళ్లి అయిన వారితో పోలిస్తే పెళ్లి లేకుండా ఏకాకిగా మిగిలిన వారిలో ఎక్కువమంది మరణించి ఉండటాన్ని పరిశోధకులు గమనించారు. వివిధ జబ్బులతో బాధపడుతున్నప్పటికీ పెళ్లైన వారు వాటిని ఎదుర్కొంటూ జీవించి ఉన్నారట.

అధిక కొలెస్ట్రాల్ తో బాధపడుతూ జీవించి ఉన్న వారిలో పెళ్లికాని వారితో పోలిస్తే పెళ్లైన వారు 16 శాతం ఎక్కువ. ఇక మధుమేహాన్ని అదుపులో ఉంచుకుని జీవిస్తున్న వారిలో పెళ్లైన వారు 14 శాతం మంది ఎక్కువ. బీపీలో పేషెంట్లలో పెళ్లికాని వారి కన్నా పెళ్లైన వారు 10 శాతం ఎక్కువమంది జీవించి ఉన్నారు. ఈ గణాంకాల ప్రకారం.. వివిధ వ్యాధులను ఎదుర్కొనగలిగే శక్తి పెళ్లి కాని వారి కన్నా, పెళ్లైన వారికి మెరుగ్గా ఉంటుందని పరిశోధకులు తేల్చారు. పెళ్లైన వారికి కుటుంబ వాతావరణం ఏర్పడుతుందని, జాగ్రత్తగా చూసుకునే వారుంటారని, వారి ఆరోగ్యం మెరుగ్గా ఉండటానికి అదే కారణమని వివరించారు. సో.. పెళ్లి ఆరోగ్యానికి క్షేమకరం అనమాట!!