పెళ్లయిన మూడునెలల్లో రెండుసార్లు దొరికిపోయాడు

మా పెళ్లయి మూడు నెలలు. కొత్తగా పెళ్లయిన ఆనందం నాలో లేనే లేదు.

ప్రశ్న: మా పెళ్లయి మూడు నెలలు. కొత్తగా పెళ్లయిన ఆనందం నాలో లేనే లేదు. భర్త తనని మాత్రమే ప్రేమించాలని ఏ భార్య అయినా కోరుకుంటోంది. నేను అలాగే కోరుకున్నా... నా భర్తకి నేనే కాదు చాలా మంది అమ్మాయిలంటే ఇష్టం. ఆడవాళ్లతో మాట్లాడడం, వారి వెంట పడడం, అక్రమ సంబంధం పెట్టుకోవడం ఇదే ఆయన పని. పెళ్లయిన మూడు నెలల్లో నాకు రెండు సార్లు వేరే ఆడవాళ్లతో కలిసి ఉండగా దొరికిపోయాడు. దొరికిపోయిన ప్రతిసారి ఇంకెప్పుడూ అలాంటి తప్పు చేయనని, క్షమించమని కోరతాడు. కానీ మళ్లీ మళ్లీ అమ్మాయిల వెనకే తిరుగుతుంటాడు. నాకు ఆయన మీద నమ్మకం పూర్తిగా పోయింది. అతనితో ఉండాలనిపించడం లేదు. అలాగని పెళ్లయిన మూడునెలలకే భర్తని వదిలి రావడం కూడా అంత మంచిది కాదనిపిస్తోంది. ఈ ఆలోచనలు నన్ను నిలువ నీయడం లేదు. చాలా ఒత్తిడిలో ఉన్నా... సరైన పరిష్కారం చూపిస్తారని కోరుకుంటున్నా.

Samayam Telugu

- ఓ సోదరి

సమాధానం: పెళ్లయి మూడునెలలే అయ్యిందంటున్నారు. భర్త నుంచి విడిపోవడం వంటి నిర్ణయాలు తీసుకోకండి. చాలా ఓపికగా, సహనంగా వ్యవహరించి మీ సంసారాన్ని చక్కబెట్టుకోవాలి. అందుకు మీరు మీ అత్తమామల సహకారాన్ని తీసుకోవాలి. మీలో మీరు కుమిలిపోయే కన్నా వారి దృష్టికి విషయాన్ని తీసుకెళ్లి... కొడుకుతో మీ సమక్షంలోనే మాట్లాడమని కోరండి. అలాగే అసలు ఎందుకు ఆయన అలా ప్రవర్తిస్తున్నాడో కనుక్కోండి. అలాగే ఇలాంటి పరిస్థితి ఎన్నో రోజులు మీరు సహించరని కూడా చెప్పండి. వీలైతే మీ తరపు పెద్దల్ని కూడా పిలిపించి మాట్లాడించండి. అతనికి కొన్ని రోజుల సమయం ఇచ్చి మారతారేమో చూడండి... అతని పరిస్థితి ఇంకా అలాగే కొనసాగితే... అలాంటి బంధంలో ఉండాల్సిన అవసరం లేదు. ఈ విషయం చాలా సున్నితంగా డీల్ చేయాల్సింది. అన్నింటికన్నా ముందుగా మిమ్మల్ని మీరు దృఢంగా మలచుకోండి. ఒత్తిడికి గురికాకండి. వీలైతే మీరూ ఒక ఉద్యోగం వెతుక్కోవడం మంచిది.

- డాక్టర్ రోషన్ బోక్డావాలా, సైక్రియాటిస్టు