పార్టనర్‌కు ఈ రహస్యాలు ఎప్పటికీ చెప్పొద్దు!

రిలేషన్‌షిప్‌లో నిజాలు చెప్పడం, దాపరికం లేకుండా వ్యవహరించడం ఎంతో ముఖ్యం. పార్టనర్ తమ దగ్గర ఏ రహస్యాలు దాచొద్దని భావిస్తుంటారు. ముఖ్యంగా ఆరోగ్యం, గతంలో ఇతరులతో ప్రేమ వ్యవహరాలు, ఆర్థిక విషయాల గురించి మాత్రం ముందుగానే చెప్పడం ఎంతో ముఖ్యం. కానీ కొన్ని సీక్రెట్లను మాత్రం పార్టనర్లతో చెప్పకపోవడమే బెటరట. ఈ సీక్రెట్లను చెప్పడం ద్వారా ఓపెన్‌గా ఉండటం అంటుంచి వారు హర్టయ్యే అవకాశాలే ఎక్కువగా ఉంటాయట. లేదంటే మీరు చెప్పే రహస్యాలు మీ బంధానికే ముప్పుగా పరిణమించే ప్రమాదం ఉంది. పార్టనర్‌తో రహస్యంగా వ్యవహరించేలా మిమ్మల్ని ఎంకరేజ్ చేయడం లేదుగానీ.. ఈ సీక్రెట్లను తనతో చెప్పకపోవడమే బెటర్. ఇంతకూ ఆ విషయాలేంటంటే..

మీరెంత ప్రయత్నించినా మీ పార్టనర్ కుటుంబంలోని లేదా ఫ్రెండ్ సర్కిల్‌కు చెందిన ఎవరో ఓ వ్యక్తితో సఖ్యత కుదరకపోవచ్చు. వారి కారణంగా వ్యక్తిగతంగా కొంత ఇబ్బందికి గురవాల్సిన పరిస్థితి తలెత్తే అవకాశాలు కూడా ఉంటాయి. కానీ సదరు వ్యక్తికి మీ భాగస్వామితో మంచి సంబంధాలు ఉండే అవకాశం ఉంది. కాబట్టి ఆ వ్యక్తికి దూరంగా ఉండండి. కానీ అతడంటే మీకు ద్వేషమని మాత్రం మీ పార్టనర్‌తో చెప్పకండి. ఆ వ్యక్తిని ఎదుర్కోవడానికి మీ సొంత పంథాను ఫాలోకండి.

ఒక్కోసారి మీ పార్టనర్ మాజీ లవర్ ఏం చేస్తుందో తెలుసుకోవాలనే కోరిక ఉంటుంది. క్యూరియాసిటీ కొద్దీ వారి సోషల్ మీడియా అకౌంట్ తెరచి చూసే అవకాశాలు కూడా ఉంటాయి. చూస్తే చూశారు గానీ ఆ విషయాన్ని మాత్రం మీ పార్టనర్‌తో చెప్పకండి. చెప్తే.. మిమ్మల్ని అనుమానించే అవకాశాలున్నాయి. మీకు జలసీ ఉందనే భావించే ప్రమాదం కూడా లేకపోలేదు.

గతంలో మరో వ్యక్తితో మీకు అనుబంధం ఉండొచ్చు. వారితో మీకు ఎన్నో మధుర స్మృతులు ఉండొచ్చు. కొన్ని సందర్భాల్లో ఆ వ్యక్తికి సంబంధించిన ఊహల్లో ఉండే అవకాశం ఉన్నప్పటికీ.. అతడితో మీ పార్టనర్‌కు పోలిక తేవద్దు. మీ గతం గురించి తనకు తెలిసినప్పటికీ.. మీ మాజీకి సంబంధించిన ప్రస్తావన తేవద్దు. ముఖ్యంగా శృంగారం విషయంలో అస్సలు పోలిక తేవద్దు. ఇది చాలా ప్రమాదం.

మీరు గతంలో వేరే వ్యక్తితో రిలేషన్‌షిప్‌లో ఉంటే చెప్పడం మంచిదే. కానీ చాలా మందితో మీరు బ్రేకప్ చేసుకొని ఉంటే మాత్రం ప్రతి ఒక్కరి గురించి చెప్పాల్సిన అవసరం లేదు.

కొందరికి షాపింగ్ అంటే పిచ్చి. ఖరీదైన గ్యాడ్జెట్లు, డ్రెస్సుల కోసం భారీగా డబ్బును వెచ్చిస్తుంటారు. సొంత సంపాదనతోనే (డబ్బు విషయంలో పార్టనర్ ప్రమేయం లేకుండా ఉన్నట్లయితే) మీ ఆనందం కోసం మీకు నచ్చిన వాటిని కొనుగోలు చేయడంలో తప్పులేదు. కానీ అప్పుల జోలికి మాత్రం వెళ్లొద్దు. ఈ విషయంలో గొడవలు వస్తుంటే మాత్రం ముందుగా మీ పార్టనర్‌కు చెప్పి షాపింగ్‌కు వెళ్లడం ఉత్తమం.