సేఫ్ సెక్స్.. ఈ జాగ్రత్తలతో ప్రమాదకర లైంగిక వ్యాధులు దూరం!

రోజూ సెక్స్ చేయడం ఆరోగ్యకరమే. కానీ, విచ్చలవిడి శృంగారం.. సుఖంతో పాటు సుఖ వ్యాధులను కూడా మోసుకొస్తుంది. ప్రమాదకర హెచ్ఐవీ ఎయిడ్స్‌తోపాటు ఇతరాత్ర లైంగిక వ్యాధులు (ఎస్‌టీడీ) కూడా సంక్రమించే ప్రమాదం ఉంది. ఈ నేపథ్యంలో సెక్స్ సమయంలో మీరు, మీ భాగస్వామి తప్పకుండా కొన్ని జాగ్రత్తలు పాటించాలి. అప్పుడే, మీ సెక్స్ లైఫ్ ఎంతో సాఫీగా, హాయిగా సాగిపోతుంది.

1. సెక్స్‌కు ముందు ఇరువురు వైద్య పరీక్షలు చేయించుకోవడం ఉత్తమం. మీలో ఎవరికైనా లైంగిక సంబంధిత సమస్యలు ఉంటే జాగ్రత్తపడేందుకు ఈ పరీక్షలు ఉపయోగపడతాయి. ఈ విషయంలో పరస్పర అంగీకారం ముఖ్యం.
2. కండోమ్ ఉపయోగించడం వల్ల మీకు అన్నివిధాలా రక్షణ లభిస్తుంది. లాటెక్స్ కండోమ్‌లు ఉపయోగించడం వల్ల వ్యాధులు దరిచేరవు.
3. ఓరల్ సెక్స్ (నోటితో సెక్స్) చేసేప్పుడు డెంటల్ డ్యామ్స్ (Dental Dams) ఉపయోగించడం మంచిది.
4. సెక్స్ తర్వాత మీ మర్మాంగాలను శుభ్రం చేసుకోవాలి. దీనివల్ల ఇన్ఫెక్షన్ కారకాలేమైనా ఉంటే తొలగిపోతాయి. పరిశుభ్రమైన సెక్స్.. మిమ్మల్ని ఎప్పుడూ ఆరోగ్యంగా ఉంచుతుంది.
5. యూటీఐ వంటివి ఏర్పడుకుండా ఉండాలంటే మహిళలు సెక్స్ తర్వాత వెంటనే మూత్రం పోసి, యోనిని శుభ్రం చేసుకోవాలి.
6. హ్యూమన్ పపిల్లోమా వైరస్ (HPV), హెపటిటీస్ బి (HBV) వంటి వ్యాధులకు వ్యాక్సిన్లు తీసుకోవడం ఉత్తమం.

గమనిక: సెక్స్ సంబంధిత సమస్యలపై మీకు అవగాహన కల్పించడమే ఈ కథనం ముఖ్య ఉద్దేశం. వైద్య సంబంధిత సలహాలు, సూచనలు, చికిత్స కోసం తప్పకుండా వైద్య నిపుణులను సంప్రదించండి.