‘గర్భిణి మహిళ’ అనే పదం వాడొద్దా..?

గర్భిణి మహిళ అనే పదం వాడటం పట్ల బ్రిటన్ ప్రభుత్వం అభ్యంతరం వ్యక్తం చేస్తోంది. లింగ మార్పిడి చేసుకున్న వ్యక్తులు కూడా గర్భం దాల్చే అవకాశం ఉండటంతో తాము ఇలా అంటున్నామని బ్రిటిష్ ప్రభుత్వం చెబుతోంది. ఈ మేరకు 1976 నాటి అంతర్జాతీయ పౌర రాజకీయ హక్కుల ఒడంబడికకు సవరణలకు ప్రతిపాదిస్తోంది. ఈ మేరకు ఫారిన్ అండ్ కామన్‌వెల్త్ ఆఫీసులో ఓ పత్రాన్ని అందజేసింది. లింగమార్పిడి చేసుకున్న పురుషులు కూడా గర్భం దాల్చే అవకాశం ఉండటంతో ‘ప్రెగ్నెంట్ పీపుల్’ అనే పదాన్ని బ్రిటన్ సూచిస్తోంది.

కానీ బ్రిటన్ ప్రభుత్వ వాదనను మహిళల హక్కుల కోసం పోరాడే ఫెమినిస్టులు తప్పుబడుతున్నారు. ప్రెగ్నెంట్ విమెన్ అనే పదాన్ని కాపాడాలని కోరుతున్నారు. ట్రాన్స్‌జెండర్ల హక్కుల కోసం మహిళలను ఇబ్బందులకు గురి చేయొద్దని సూచిస్తున్నారు. యూఎన్ ట్రీటీ కూడా బ్రిటన్ వాదనతో విభేదిస్తోంది.

దేశంలోని లింగ గుర్తింపు చట్టంలో మార్పులు తేవడం కోసం చర్చలు జరపనున్నట్లు బ్రిటన్ ప్రధాని థెరెసా మే గత వారం ప్రకటించారు. జనాభా లెక్కల్లో ‘సెక్స్’ ఏంటో చెప్పడం చెప్పకపోవడం మీ ఇష్టం అనేలా చట్టాన్ని మారుస్తామంటోంది. ట్రాన్స్‌జెండర్ల సమానత్వం కోసం ఇలా చేస్తూ పోతే.. మగాడి పుట్టి, మహిళగా మారిన వ్యక్తులు ఆడవాళ్ల హాస్పిటల్ వార్డులు, జైళ్లు, బాత్రూమ్‌లు వాడుకునే వీలుందని, క్రీడల్లోనూ మహిళలుగానే పోటీ పడతారని విమర్శకులు హెచ్చరిస్తున్నారు.