మాతృదినోత్సవానికి ఘన చరిత్ర!

సృష్టికి మూలం అమ్మ. తన బిడ్డలను కంటికి రెప్పలా కాపాడుతూ గుండెల్లో పెట్టుకుని పెంచుతుంది అమ్మ. బువ్వపెట్టి, బుజ్జగించి, లాలించి, పాలించి.. తన బిడ్డల్ని ప్రయోజకుల్ని చేసేంతవరకు విశ్రమించదు అమ్మ. ఈ సృష్టిలో అమ్మకన్నా విలువైంది ఏదీ లేదు. అందుకే ‘మాతృదేవో భవ’ అని దైవంతో సమానంగా అమ్మను కొలుస్తాం. అలాంటి అమ్మకు ఏమిచ్చి రుణం తీర్చుకోగలం. ఆ తల్లిని గౌరవించాలన్న ఆలోచనతో పుట్టినదే ‘మదర్స్ డే’. ఎక్కడో అమెరికాలో మొదలైన ఈ సంప్రదాయం ఇప్పుడు ప్రపంచవ్యాప్తంగా జరుపుకునే స్థాయికి వెళ్లింది.

బీజం పడిందిక్కడ..

అమెరికాకు చెందిన మేరీ జార్వీస్ మదర్స్ డేకు నాంది పలికారు. ఆమె తల్లి ఎన్.జార్వీస్‌కి మదర్స్ డే ఏర్పాటుచేయాలనే కోరిక ఉండేదట. తన ఆశయం నెరవేకుండానే మే 9, 1905న ఎన్.జార్వీస్ కన్నుమూశారు. ఆ తరవాత మేరీ జార్వీస్ ఈ మహా కార్యానికి శ్రీకారం చుట్టారు. మదర్స్ డేను మే రెండో ఆదివారం జరుపుకోవాలని నిర్ణయించారు. అమెరికాలో మదర్స్ డేను జాతీయ సెలవు దినంగా ప్రకటించాలని మేరీ ప్రచారం మొదలుపెట్టారు. తదనంతరం మాతృదినోత్సవాన్ని అంతర్జాతీయంగా సెలవు దినంగా ప్రకటించాలని నినాదం తీసుకొచ్చారు. దీనికి విస్తృతంగా మద్దతు కూడగట్టారు.

యూఎస్ మదర్స్ డే పోస్టల్ స్టాంపు..

మదర్స్ డేను సెలవు దినంగా ప్రకటించాలని మొదటిగా అమెరికాలోని పశ్చిమ వర్జీనియా రాష్ట్రం నిర్ణయించింది. 1910లో అధికారిక సెలవు దినాన్ని ప్రకటించింది. ఆ తరవాత యూఎస్‌లోని మిగిలిన రాష్ట్రాలు మదర్స్ డేను సెలవు దినంగా ప్రకటించాయి. మే నెలలో రెండో ఆదివారాన్ని మదర్స్‌డేగా గుర్తిస్తూ మే 8, 1914న యూఎస్ కాంగ్రెస్ ఓ చట్టాన్ని చేసింది. అప్పటి అమెరికా అధ్యక్షుడు ఉడ్రో విల్సన్.. తొలి జాతీయ మాతృదినోత్సవాన్ని మే 9, 1914న ప్రకటించారు. మదర్స్‌ డేపై 1934లో తొలిసారి అమెరికా పోస్టల్ స్టాంపు విడుదల చేసింది. ఇంత ఘన చరిత్ర ఉన్న అమ్మ పండుగను ఇప్పుడు ప్రపంచ వ్యాప్తంగా జరుపుకుంటున్నాం.