కొంచెం క్లోజ్ అయితేనే అడిగేస్తున్నారు..?

ప్రశ్న: నా వయసు 26 ఏళ్లు. ఒక ఉన్నత సంస్థలో ఉద్యోగం చేస్తూ.. ఒంటరిగా సంతోషకరమైన జీవితాన్ని గడుపుతున్నాను. చిన్నప్పటి నుంచి అందరితో కలివిడిగా ఉండటం నాకు ఇష్టం. ఇందులో భాగంగానే ఆఫీస్‌లోనే కాకుండా వెలుపల కూడా చాలా మంది‌తో స్నేహంగా ఉంటున్నాను. కానీ.. ఈ మధ్యకాలంలో కొంత మంది మగవాళ్లు నన్ను ఉద్దేశపూర్వకంగా తాకడం, పరోక్షంగా వారి కోరికను వెల్లడించడం జరిగింది. ఇక్కడ నా తప్పు ఏంటో అర్థం కావడం లేదు. వారితో చనువుగా ఉండటమే నేను చేసిన నేరమా..? ఒక మహిళ సమాజంలో పురుషులతో అలా ఉండకూడదా..? దయచేసి సలహా ఇవ్వగలరు - ఓ సోదరి

జవాబు: సమాజంలో కొంతమందికి ఆలోచన పరిపక్వత ఉండదు. ఒక మహిళ చనువుగా మాట్లాడితే చాలు.. ఆమె అన్నింటికీ ఒప్పుకుంటుందనే భ్రమలో ఉండిపోతున్నారు. మీరు ఉన్నత సంస్థలో ఉద్యోగం చేస్తున్నారని రాశారు. ఆఫీస్‌లో ఎలాంటి ఇబ్బందికర పరిస్థితులు మీరు ఎదుర్కోకుండా స్వేచ్ఛగా ఉండాలనుకుంటే మీకంటూ కొన్ని నియమ నిబంధనలను ఏర్పాటు చేసుకోండి. ఆఫీస్ వాళ్లంటే కాఫీకి పిలిచేవరకూ ఫర్వాలేదు. కానీ.. పబ్, సినిమాలకి పిలిచే సహచరుల్ని, గ్యాంగ్స్‌ని దూరంగా పెట్టడం మంచిది. ఫోన్, సోషల్ మీడియా వాడకంలో జాగ్రత్త వహిస్తూ.. వ్యక్తిగత సమాచారం, ఫొటోలు తెలియని వారికి తెలిసేలా ఉంచకండి. అలా అని సమాజంలో అందరూ చెడ్డవారని కాదు.. కానీ.. సన్నిహితులు ఎవరో గుర్తించుకుని మీ సంతోషకరమైన జీవితాన్ని కొనసాగించండి. ఏది ఏదైనా.. మనం ఇచ్చే చనువును బట్టే ఎదుటి వ్యక్తి ఆలోచన, చేష్టలు ఆధారపడి ఉంటాయనే విషయాన్ని గుర్తించుకోండి.

సలహా ఇచ్చినవారు అశ్విని , సైకాలజిస్ట్, ముంబయి