పెళ్లయ్యాక మగాళ్లు బరువు పెరుగుతారెందుకు?

పెళ్లయ్యాక, పిల్లలు పుట్టిన తర్వాత ఆడవాళ్లు బరువు పెరుగుతారు. మరి మగాళ్లు కూడా వివాహం తర్వాత బరువు పెరుగుతారా? చాలా మంది పురుషులు దాంపత్య జీవితంలో అడుగుపెట్టాక బరువు పెరుగుతారని ఓ అధ్యయనంలో వెల్లడైంది. పిల్లలు పుట్టిన కొత్తలో కూడా మగాళ్లు వేగంగా బరువు పెరుగుతారట. ఒంటరిగా ఉన్నప్పుడు ఎవరైనా ఫిట్‌నెస్ మీద అధిక శ్రద్ధ చూపుతారు. బ్యాచిలర్స్ బరువు పెరగకుండా ఉండేందుకు శ్రమిస్తారు.

పెళ్లయిన కొత్తలో ఎక్కువగా ఆహారం తీసుకోవడం, భద్రతాభావం ఏర్పడటం వల్ల బరువు పెరుగుతారు. కొత్త అల్లుడనే కారణంతో అత్తగారింటి వాళ్లు కూడా వద్దన్నా ఆహారం వడ్డిస్తారు. బంధువుల ఇళ్లకు వెళ్లినా ఇదే పరిస్థితి. దీంతో ఆహారం తీసుకునే మోతాదు పెరుగుతుంది. ఇది బరువు పెరగడానికి దోహదం చేస్తుంది. వివాహం అయ్యాక కూడా బరువు పెరగొద్దంటే రెగ్యులర్‌గా ఎక్సర్‌సైజ్ చేయడంతోపాటు డైట్ మెయిన్‌టెన్ చేయాలి.

భార్యతో దూరంగా ఉంటున్న పురుషులు బరువు తగ్గుతున్నట్లు కూడా పరిశోధనలో తేలింది. వివాహమైన తర్వాత తరచుగా బయటికి వెళ్లడం, రుచికరంగా ఉండే, కేలరీలు అధికంగా ఉండే ఆహారాన్ని ఎక్కువ మోతాదులో తీసుకోవడమే దీనికి కారణమని పరిశోధకులు అభిప్రాయపడ్డారు. ఇంగ్లండ్‌కు చెందిన బాత్ యూనివర్సిటీ పరిశోధకులు ఈ అధ్యయనం చేపట్టారు.