కేంద్ర హోం శాఖ వెబ్‌సైట్ హ్యాక్!

కేంద్ర, రాష్ట్ర ప్రభుత్వాల వెబ్‌సైట్లు సైబర్ సెక్యూరిటీ జాగ్రత్తలు వహించడంలేదని నివేదిక వచ్చి కొన్ని రోజులైనా గడవక ముందే కేంద్ర హోం శాఖ వెబ్‌సైట్‌ను దుండగులు హ్యాక్ చేసారు. ఈ మేరకు ఆదివారం ఉదయం మినిస్ట్రీ ఆఫ్ హోం అఫైర్స్ వెబ్‌సైట్ హ్యాకింగ్‌కు గురైనట్లు అధికారులు వెల్లడించారు. అయితే వెబ్‌సైట్ హ్యాకింగ్‌కు గురైనట్లు వెంటనే గుర్తించిన నేషనల్ ఇన్ఫర్మేటిక్స్ సెంటర్ అధికారులు తక్షణమే సైట్‌ను బ్లాక్ చేసారు.

ఈ ఘటనపై కంప్యూటర్ ఎమెర్జన్సీ రెస్పాన్స్ టీమ్స్ విచారణ చేపట్టాయని సంబంధిత అధికారులు వెల్లడించారు. యూజర్లు సైట్‌ను ఓపెన్ చేసినప్పుడు అది యాక్సెస్ కాకుండా ఉండేలా సైబర్ నేరగాళ్లు దీన్ని హ్యాక్ చేసారని చెప్పారు. వాస్తవానికి ఆ సమయంలో గూగుల్ క్రోమ్‌లో ఎంహెచ్ఏ వెబ్‌సైట్ ఓపెన్ చేయడానికి ప్రయత్నిస్తే ‘ద సైట్ కాంట్ బి రీచ్డ్’ అనే మెసేజ్ కనిపించింది.

ఈ ఏడాది జనవరిలో కూడా నేషనల్ సెక్యూరిటీ గార్డ్ (ఎన్‌ఎస్‌జీ) వెబ్‌సైట్‌ను పాకిస్థాన్‌కు చెందిన సైబర్ నేరగాళ్లు హ్యాక్ చేసారు. ప్రధాన మంత్రిపై అసభ్యకర మెసేజ్‌లతో పాటు, దేశ వ్యతిరేక వ్యాఖ్యలను వెబ్‌సైట్‌లో వచ్చేలా చేసారు. మరోవైపు, గడిచిన నాలుగేళ్లలో 700కి పైగా కేంద్ర, రాష్ట్ర ప్రభుత్వ వెబ్‌సైట్లు హ్యాకింగ్‌కు గురైనట్లు కేంద్ర హోం శాఖ లోక్‌సభకు వెల్లడించింది. అలాగే సైబర్ నేరాల్లో మొత్తం 8,348 మందిని అరెస్టు చేసినట్లు తెలిపింది.