తప్పిపోయిన పిల్లల్ని వెతికే మొబైల్ యాప్!

తప్పిపోయిన పిల్లల్ని వెతికిపెడుతోంది ఓ మొబైల్ యాప్. గతేడాది చైనాలో తప్పిపోయిన వందలాది మంది పిల్లల్ని వెతికిపెట్టడంలో ఓ మొబైల్ యాప్ అధికారులకు ఎంతగానో సాయపడిందని జిన్హువా న్యూస్ ఏజెన్సీ శనివారం వెల్లడించింది. పిల్లల అక్రమ రవాణా అత్యధికంగా జరిగే చైనాలో గతేడాది 611 పిల్లల్ని కాపాడినట్లు ప్రజా భద్రత మంత్రిత్వ శాఖ వెల్లడించినట్లు జిన్హువా పేర్కొంది.

చైనీస్ భాషలో ‘TuanYuan’గా పిలిచే ఈ యాప్‌ను అలీబాబా గ్రూప్ హోల్డింగ్స్ లిమిటెడ్ తయారుచేసింది. గతేడాది మే నెలలో ప్రారంభించిన ఈ యాప్‌లో పోలీసు అధికారులు ఒకరికొకరు సమాచారం షేర్ చేసుకొని విధులు నిర్వహించే విధంగా సదుపాయం కల్పించారు. ఎక్కడైనా పిల్లాడు కనిపించకుండాపోతే అక్కడి నుంచే ఈ యాప్ ద్వారా వెంటనే పుష్ నోటిఫికేషన్ ఇవ్వొచ్చు. ఫొటోలు, వివరాలు కూడా షేర్ చేయొచ్చు. యూజర్ ఉన్న లొకేషన్‌ను యాప్ పరిగణనలోకి తీసుకొని అప్పటికే దానిలో రిజిస్టర్ అయి ఉన్న వాళ్లందరికీ సమాచారం అందిస్తుంది.

పిల్లాడి ఆచూకీ తెలిసేంతవరకు యూజర్లందరికీ ఈ నోటిఫికేషన్లు వెళ్తూనే ఉంటాయి. ఈ యాప్‌లో పోలీసులు కూడా రిజిస్టరై ఉండటంతో పిల్లల ఆచూకీ కనుక్కోవడం సులభతరమైంది.