పేటీఎం ద్వారా ట్రాఫిక్ చలానాలు

ఇప్పటి వరకు మొబైల్ రీచార్జ్‌లు, కరెంట్ బిల్లులు, గ్యాస్ బిల్లులు లాంటివి చెల్లించడానికి ఉపయోగించిన డిజిటల్ వ్యాలెట్ పేటీఎంను ఇకపై ట్రాఫిక్ చలానాలు కట్టడానికి కూడా వాడుకోవచ్చు. ఈ మేరకు పేటీఎం తన యాప్‌లో ‘పే యువర్ ట్రాఫిక్ చలాన్’ సదుపాయాన్ని కల్పించింది. యాప్ ఓపెన్ చేసిన తరవాత ‘రీచార్జ్ ఆర్ పే ఫర్’ నేవిగేషన్‌లో ‘చలాన్’ ఆప్షన్ ఉంటుంది. దీనిపై క్లిక్ చేసి మీ ఏరియా, వాహనం నంబర్‌ని ఎంటర్ చేయాల్సి ఉంటుంది. వెంటనే మీ వాహనం చలానాల చరిత్ర తెరపై ప్రత్యక్షమవుతుంది.

అయితే ప్రస్తుతం ఈ సదుపాయం విజయవాడ, పుణే, ముంబై నగరాలకు మాత్రమే అందుబాటులో ఉంది. ఈ నగరాల్లో రిజిస్ట్రేషన్ చేయించిన వాహనాలకు మాత్రమే ట్రాఫిక్ చలానాలకు పేటీఎం ద్వారా చెల్లించొచ్చు. హైదరాబాద్‌తో పాటు ఇతర నగరాల ట్రాఫిక్ పోలీస్ డిపార్ట్‌మెంట్లతో చర్చలు జరుపుతున్నామని త్వరలోనే ఈ సేవలకు మిగిలిన నగరాలకు విస్తరిస్తామని పేటీఎం సీనియర్ వైస్ ప్రెసిడెంట్ కిరణ్ వాసిరెడ్డి చెప్పారు.