ఐపీఎల్‌ని దున్నేస్తున్న పాండ్య బ్రదర్స్..!

ఐపీఎల్‌ పదో సీజన్‌లో పాండ్య బ్రదర్స్ వరుస సంచనాలతో దూసుకెళ్తున్నారు. ముంబయి ఇండియన్స్‌కి ప్రాతినిధ్యం వహిస్తున్న హార్దిక్ పాండ్య, క్రునాల్ పాండ్య జట్టు ప్రదర్శనలో వెన్నెముకలా నిలుస్తున్నారు. గత గురువారం రైజింగ్ పుణె సూపర్ జెయింట్ బౌలర్ అశోక్ దిండా వేసిన ఇన్నింగ్స్ చివరి ఓవర్‌లో హార్దిక్ పాండ్య వరుసగా 6, 6, 6, 4, 6 బాది ఔరా అనిపించాడు. తాజాగా ఆదివారం రాత్రి కోల్‌కతా నైట్‌రైడర్స్‌తో జరిగిన మ్యాచ్‌లో మరోసారి హార్దిక్ పాండ్య (29 నాటౌట్: 11 బంతుల్లో 3x4, 2x6) తన హిట్టింగ్‌తో దాదాపు చేజారిపోయిన మ్యాచ్‌ని ఒడిసిపట్టి ముంబయిని గెలిపించాడు. ఈ మ్యాచ్‌లోనే అతడి బ్రదర్ క్రునాల్ పాండ్య (3/24) కూడా తన స్పిన్ బౌలింగ్‌తో కోల్‌కతా హిట్టర్లని బోల్తొ కొట్టించి ఆ జట్టును ఆత్మరక్షణలోకి నెట్టేశాడు. రాబిన్ ఉతప్ప, యూసఫ్ ఫఠాన్‌లు క్రునాల్ బౌలింగ్‌లోనే భారీ షాట్‌కి యత్నించి.. బౌండరీ లైన్ వద్ద ఒకే తరహాలో హార్దిక్ పాండ్య చేతికి చిక్కడం ఈ అన్నదమ్ముల గేమ్ ప్లాన్‌కి నిదర్శనం.

చివరి ఓవర్‌లో ముంబయి విజయానికి 11 పరుగులు అవసరం కాగా.. ఆ ఓవర్‌లో రెండు ఫోర్లు బాదిన హార్దిక్ పాండ్య గెలుపు సంబరాల్లో తొలుత కౌగిలించుకుంది బ్రదర్ క్రునాల్‌నే. గత ఏడాది నుంచి ముంబయి జట్టుకు ఆడుతున్న ఈ బ్రదర్స్‌లో ఒకరు విఫలమైనా.. మరొకరు సత్తాచాటుతున్నారు. మ్యాచ్ గెలిపించే ఇన్నింగ్స్ ఆడిన తర్వాత.. పెవిలియన్‌లో ఉన్న బ్రదర్‌ని గుర్తుకు తెచ్చేలా మైదానంలో ప్రవర్తించడం వీరి శైలి. ఉదాహరణకి... క్రునాల్ పాండ్య బ్యాట్‌తో ఫెయిల్ అయినప్పుడు.. హార్దిక్ పాండ్య అర్ధశతకం బాదితే అతను అభివాదం చేస్తున్న సమయంలో లెప్ట్ హ్యాండ్ బ్యాటింగ్ శైలిని ఓసారి అనుకరించి క్రునాల్‌ని గుర్తుకు తెస్తాడు. హార్దిక్ పాండ్య కుడిచేతి వాటం బ్యాటింగ్, పేస్ బౌలింగ్ చేస్తుండగా.. క్రునాల్ పాండ్య ఎడమచేతి వాటం బ్యాటింగ్, స్పిన్ బౌలింగ్ చేస్తాడు. మైదానంలో వీరి శైలి వేరైనా.. మనసు మాత్రం ఒక్కటే అనేంతలా ప్రవర్తిస్తుంటారు ఈ బ్రదర్స్. తాజా ఐపీఎల్‌లో వీరి సంబరాలు మైదానంలో అభిమానుల్ని అమితంగా ఆకర్షిస్తున్నాయి.