తెలంగాణలో ఉన్న సాఫ్ట్వేర్ ఉద్యోగులకు గుడ్న్యూస్. 3 'డీ' (డిజిటైజ్, డీకార్బోనైజ్, డీసెంట్రలైజ్) మంత్రంతో ముందుకెళ్తోన్న సర్కారు.. సాఫ్ట్వేర్ రంగాన్ని కేవలం హైదరాబాద్లోనే కాకుండా రాష్ట్రంలోని అన్ని జిల్లా కేంద్రాలకు విస్తరిస్తోంది. ఇందులో భాగంగానే అన్ని జిల్లాల్లో ఐటీ హబ్ల నిర్మాణం చేపట్టింది. కాగా.. దాదాపు అన్ని జిల్లాల్లో ఈ ఐటీ హబ్ల నిర్మాణం పూర్తైంది. ఇప్పటికే వరంగల్, ఖమ్మం, కరీంనగర్ జిల్లాల్లో ప్రారంభమై విజయవంతంగా దూసుకుపోతున్నాయి. ఈ క్రమంలోనే నిజామాబాద్, మహబూబ్నగర్, నల్గొండ, సిద్దిపేట, ఆదిలాబాద్ జిల్లాల్లో త్వరలోనే వీటిని ప్రారంభించి.. అందుబాటులోకి తీసుకురానున్నారు. వీటి వల్ల సాఫ్ట్వేర్ రంగం జిల్లా స్థాయిలోనూ అభివృద్ధి చెందటమే కాకుండా.. ఎంతో మంది యువ టెకీల స్టార్టప్లకు ఇవి కేంద్రాలుగా మారనున్నాయి.