ధోనీ షాట్‌ను కాపీ కొట్టిన కేదార్ జాదవ్

బెంగళూరు రాయల్ ఛాలెంజర్స్, ఢిల్లీ డేర్‌డెవిల్స్ జట్ల మధ్య జరిగిన మ్యాచ్‌లో కేదార్ జాదవ్ అద్భుత బ్యాటింగ్‌తో రాయల్ ఛాలెంజర్స్ విజయంలో కీలకపాత్ర పోషించాడు. ఈ మ్యాచ్‌లో 37 బంతుల్లోనే 69 పరుగులు చేసిన కేదార్ ఐపీఎల్‌లో మరో హాఫ్ సెంచరీతోపాటు, టీ20ల్లో అత్యధిక వ్యక్తిగత పరుగులను తన ఖాతాలో వేసుకున్నాడు. కోహ్లి, డివిలియర్స్ జట్టులో లేనివేళ.. కేదార్ అద్భుత బ్యాటింగ్‌తో ఆ లోటు తెలియకుండా చేశాడు.

ఆదివారం జరిగిన మ్యాచ్‌లో మ్యాన్ ఆఫ్ ది మ్యాచ్ అవార్డు గెలుచుకున్న కేదార్ జాదవ్ హెలికాఫ్టర్ షాట్‌తో అభిమానులను ఆకట్టుకునేందుకు ప్రయత్నించాడు. ఇన్నింగ్స్ 14వ ఓవర్లో కేదార్ ఈ షాట్ ఆడటంతో అభిమానులు ఫుల్ ఖుషీ అయ్యారు. ధోనీ షాట్ కాపీ కొట్టిన జాదవ్.. బ్రాత్‌వైట్ వేసిన బంతిని బౌండరీ దాటించాడు. స్టువర్ట్ బిన్నీతో కలిసి జాదవ్ నాలుగో వికెట్‌కు 66 పరుగులు జోడించడంతో ముందుగా బ్యాటింగ్ చేసిన బెంగళూరు జట్టు ఏడు వికెట్ల నష్టానికి 157 పరుగులు చేసింది.


బదులుగా ఢిల్లీ జట్టు 9 వికెట్ల నష్టానికి 142 పరుగులు మాత్రమే చేయగలిగింది. యంగ్ బ్యాట్స్‌మెన్ రిషబ్ పంత్ 36 బంతుల్లో 57 పరుగులు చేసినప్పటికీ చివరి ఓవర్ తొలి బంతికి అవుట్ కావడంతో ఢిల్లీ ఓటమిపాలైంది. బుధవారం రాత్రే పంత్ తండ్రి గుండెపోటుతో మరణించిన సంగతి తెలిసిందే.