నెలవంక కనిపించే వేళను బట్టి..
ఇస్లాం క్యాలెండర్ ప్రకారం, షవ్వాల్ నెలలో తొలి రోజు అంటే ఈద్ ఉల్ ఫితర్ రోజున ముస్లింలు ఉపవాసం ఉండకూడదు. నెలవంక కనిపించే సమయాన్ని బట్టి ఒక్కో ప్రాంతంలో పండుగ తేదీలు మారుతూ ఉంటాయి. రంజాన్ మాసం తొమ్మిదో నెలలో వస్తుంది. ఈ మాసం ముస్లింలకు ఎంతో పవిత్రమైనది. ఈ కాలంలో కఠినమైన ఉపవాస దీక్షల్లో ఉంటారు. తప్పనిసరిగా ఖురాన్ పఠిస్తారు. ఉపవాస దీక్షలు ఉండే వారు కచ్చితంగా రోజుకు ఐదు సార్లు నమాజ్ చేస్తారు.
దాన ధర్మాలు..
పండుగ పూట నమాజ్‌కు ముందు పేదలకు ఇచ్చే దానాన్నే ఫితర్ అంటారు. అందుకే ఈ పండుగకు ఈద్-ఉల్-ఫితర్ అనే పేరొచ్చింది. ముస్లింలు ఉపవాస కాలంలో ఎన్ని జాగ్రత్తలు తీసుకున్నా కొన్నిసార్లు తెలిసి.. తెలియకుండా ఏవేవో తప్పులు, పొరపాట్లు జరుగుతుంటాయి. వాటి పరిహారం కోసం చేసే దానమే ఫితర్. ఇలా దానం చేయడం వల్ల పేదలు కూడా కొత్త బట్టలు ధరించి, మంచి ఆహార పదార్థాలను తీసుకునే అవకాశం ఉంటుంది. అందుకే ఈ పండుగ పూట గోధుమలు, తమ సంపాదనలో కొంత సొమ్మును దానం చేస్తారు.
జకాత్ అంటే..
ఇస్లాం మత విశ్వాసాల ప్రకారం, జకాత్ అంటే దానం ఇవ్వడం. దీని వల్ల ప్రజల్లో త్యాగం, సానుభూతి, సహకారాలు పెరుగుతాయని నమ్ముతారు. అందుకే ప్రతి ఒక్క వ్యక్తి తాము సంపాదించిన సొమ్ములో ఎవరికైతే అవసరం ఉంటుందో వారికి కొంత దానం చేసి ఆదుకోవాలి. ముఖ్యంగా తమ దగ్గర ఉన్న ఆస్తి, బంగారం, వెండి, పంటలు, వ్యాపార సరుకులు, జంతువులు, పక్షులను కూడా లెక్కలేసి అందులో 2.5 శాతం దానం చేయాలి. ఇలా రంజాన్ మాసంలో జకాత్ చెల్లిస్తే శుభ ఫలితాలొస్తాయని ముస్లింలందరూ నమ్ముతారు.
రంజాన్ మాసంలోనే..
ఇస్లాం ప్రకారం, ముస్లింలు అత్యంత పవిత్రంగా భావించే ఖురాన్ గ్రంథం ఆకాశం నుంచి భూలోకంలోకి వచ్చింది రంజాన్ మాసంలోనే. అందుకే ఈ కాలంలో ఉపవాస దీక్షలతో తమ శరీరాన్ని, ఆత్మను శుద్ధి చేసుకోవాలనుకుంటారు. ఇలా చేయడం వల్ల కామ, క్రోధ, లోభ, మోహ, మద, మత్సరాలు అదుపులో ఉంటాయని నమ్ముతారు. అంతేకాదు రంజాన్ మాసంలో ఉపవాస దీక్ష ఉండటం వల్ల అనేక విషయాలు అవగతమవుతాయి. మనో నిగ్రహమూ ఏర్పడుతుంది. ఆకలి విలువ ఏంటో తెలుస్తుంది.
గమనిక : ఇక్కడ అందించిన సమాచారం, పరిహారాలన్నీ మత విశ్వాసాలపై ఆధారపడి ఉన్నాయి. ఇవి కేవలం ఊహాల ఆధారంగా ఇవ్వబడింది. దీనికి సంబంధించి ఎలాంటి శాస్త్రీయ ఆధారాలు లేవు.
Read Latest Religion News and Telugu News