శుభ ముహుర్తం..
హిందూ పంచాంగం ప్రకారం ఆగస్టు 30వ తేదీ మధ్యాహ్నం 3:34 గంటలకు భాద్రపద శుక్ల పక్షంలో చతుర్థి తిథి ప్రారంభమవుతుంది. ఆగస్టు 31వ తేదీ బుధవారం మధ్యాహ్నం 3:23 గంటలకు ఈ తిథి ముగియనుంది. ఈ సమయంలో విఘ్నాలు తొలగించే విఘ్నేశ్వరుడు తనతో పాటు శుభకరమైన రవియోగాన్ని తీసుకువస్తున్నారు. ఈ యోగం అన్ని అడ్డంకులను నాశనం చేసే సామర్థ్యం కలిగి ఉంటుందని పండితులు చెబుతున్నారు.
తెలుగు రాష్ట్రాల్లో గణేష్ మండపాల్లో వినాయకుని ప్రతిమలను ఉదయం 11:01 నుండి మధ్యాహ్నం 1:31 మధ్యలో ప్రతిష్టించి, పూజలను ప్రారంభించాలి.
Ganesh Chaturthi 2022 వాస్తు ప్రకారం, వినాయకుని విగ్రహం ఏ దిశలో ప్రతిష్టిస్తే శుభ ఫలితాలొస్తాయంటే...
పది రోజులు.. ప్రత్యేక పూజలు..
వినాయక చవితి రోజున గణేశుని ప్రతిమను ప్రతిష్టించి ప్రత్యేక పూజలు చేస్తారు. ఈ నేపథ్యంలో కొందరు వినాయక విగ్రహాలను తమ ప్రాంతాల్లో ఒక రోజు, మూడు రోజులు, ఐదు రోజులు, ఏడు రోజులు, తొమ్మిది రోజుల పాటు గణేష్ ఉత్సవాలను ఘనంగా నిర్వహిస్తారు. అదే విధంగా వినాయకుని విగ్రహాన్ని ఇంట్లో ఉంచడం ద్వారా తమ కుటుంబంలో కష్టాలన్నీ తొలగిపోతాయని చాలా మంది నమ్మకం.
గణేశుని పూజలో..
వినాయక పూజ ప్రారంభించడానికి ముందు ఈ వస్తువులను తప్పనిసరిగా ఉండేలా చూసుకోవాలి. గణేశుని పూజలో అత్యంత ముఖ్యమైనది మోదకం నైవేద్యం. వీటితో పాటు లడ్డూలు, ఉండ్రాళ్లు, కుడుములు కూడా వినాయకునికి ఇష్టమైనవిగా భావిస్తారు. అలాగే అరటి ఆకులు, కొబ్బరి మట్టలు, వెలక్కాయ, గరిక వంటి వస్తువులు తప్పనిసరిగా ఉండేలా చూసుకోవాలి. మట్టి గణపతినే పూజించాలి. సహజ రంగుల్లో ఉండే వినాయకుడినే ఆరాధించాలి.
వేద జ్యోతిష్యం ప్రకారం..
హిందూ పంచాంగం ప్రకారం, సమయాన్ని ఐదు సమాన భాగాలుగా విభజించారు. అందులో మొదటి ప్రాతఃకాలం, సనగవ, మధ్యాహ్నం, అపరహ్న, సాయంకాలం. వేద జ్యోతిస్యశాస్త్రం ప్రకారం, మధ్యాహ్నం సమయంలో వినాయకుడు జన్మించాడని భావిస్తారు. అందుకే ఈ సమయంలోనే ఎక్కువగా పూజలు జరుపుకుంటారు.
Ganesh Chaturthi 2022 వినాయక చవితి నాడు ఏ రాశి వారు ఎలాంటి మంత్రాలను పఠించాలంటే...!
ఇవి కచ్చితంగా చేయాలి..
* శుభ ముహుర్తం సమయంలోనే వినాయకుని ప్రతిమను ఇంట్లో ప్రతిష్టించాలి. ఆ తర్వాతే పూజను ప్రారంభించాలి.
* ఇంట్లో మీరు స్వయంగా వండిన ఆహారాన్నే స్వామి వారికి నైవేద్యంగా సమర్పించాలి. ఆ తర్వాతే ఇతరులు తీసుకోవాలి.
* స్వామి వారిని నిమజ్జనం చేసే సమయంలో హారతి కచ్చితంగా ఇవ్వాలి. హారతి ఇవ్వకుండా నిమజ్జనం చేయకూడదు.
* ఇంట్లో చిన్ని గణపతిని నిమజ్జనం చేసే సమయంలో ఏదైనా కుండలో లేదంటే.. బకెట్లో నీటిలో నిమజ్జనం చేయాలి. లేదంటే దగ్గర్లోని చెరువుల్లో నిమజ్జనం చేయాలి.
ఈ పనులు చేయొద్దు..
* గణేష్ చతుర్థి రోజున మద్యం మాంసం వంటి వాటి జోలికి వెళ్లకూడదు.
* వినాయకుని ప్రతిమను ప్రతిష్టించినప్పుడు ఇంట్లో ప్రధాన ద్వారం మూసివేయడం వంటివి చేయొద్దు. కచ్చితంగా తెరిచి ఉండేలా చూసుకోవాలి. అదే విధంగా ఇంట్లో నిమజ్జనం సమయంలో మెయిన్ గేటును తెరిచే ఉంచాలి.
* వినాయకుని ఇంట్లో ప్రతిష్టించే వారు ఆ విగ్రహాన్ని నిమజ్జనం చేసే వరకు ఇంట్లో నిత్యం ఎవరో ఒకరు ఉండాలి. విగ్రహాన్ని ఇంట్లో ఉంచి అందరూ బయటకు వెళ్లకూడదు.
* ఈ పండుగ రోజున ఎవరిపైన కోప్పకూడదు. ప్రశాంతంగా ఉండాలి.