శైవక్షేత్రాల్లో కార్తీక శోభ.. భక్తులతో కిక్కిరిసిన ఆలయాలు

తెలుగు రాష్ట్రాల్లోని శైవ క్షేత్రాలు గురువారం భక్తులతో కిటకిటలాడాయి. కార్తీక మాసం మొదటి రోజు కావడంతో భక్తులంతా తెల్లవారుజామున పుణ్య స్నానాలు ఆచరించారు. శివాలయాలన్నీ శివనామ స్మరణతో మార్మోగాయి. శ్రీశైలం, శ్రీకాలహస్తి, అమరావతి ద్రాక్షారామం, సామర్లకోట, పాలకొల్లు, భీమవరంలోని శైవక్షేత్రాల్లో కార్తిక శోభ సంతరించుకుంది.

కృష్ణా, గోదావరి నదీ ప్రాంతాలు భక్తులతో కిటకిటలాడాయి. భక్తులు కార్తీక దీపాలను నదిలోకి వదిలి భక్తిశ్రద్ధలతో ప్రత్యేక పూజలు నిర్వహించారు. ఏకాదశ రుద్రాభిషేకాలు, లక్ష బిల్వర్చన పూజలు నిర్వహించారు. ఈ నెల 11న కార్తీక మాసం మొదటి సోమవారం కావడంతో శివాలయాల్లో భక్తుల రద్దీ పెరిగే అవకాశం ఉంది.