Vinayaka Chavithi Date: వినాయక వ్రత పూజా సమయం, శుభముహూర్తం ఇదే

పండుగలు మన సంస్కృతి, సంప్రదాయాలకు అద్దం పడుతూ నవరత్నాలతో కూడిన హారంలా ప్రకాశిస్తూ భారతీయుల ఔన్నత్యాన్ని తెలియజేస్తాయి. అలాంటి వాటిలో విశిష్టమైంది వినాయకచవితి. ఏ పని ప్రారంభించినా తొలి పూజ వినాయకుడిదే. అటువంటి విఘ్నేశ్వరుని ప్రత్యేకంగా ఆరాధించే పండుగను కులమతాలకు అతీతంగా ఎంతో వేడుకగా జరుపుకుంటారు. కేవలం భారత్‌లోనే కాదు ప్రపంచంలోని అనేక ప్రాంతంలో వినాయక చవితి ఉత్సవాలను జరుపుకోవడం విశేషం.

భాద్రపద శుద్ధ చవితి రోజున విఘ్నేశ్వరుడు పుట్టిన రోజని కొందరు, గణాధిపత్యం పొందిన రోజని ఇంకొందరు భావిస్తారు. మహేశ్వరాది దేవతా గణాలకు గణపతి ప్రభువు. అంటే సకలదేవతలకు ఆయనే ప్రభువన్న మాట. బ్రహ్మ తొలుత సృష్టి కార్యాన్ని ప్రారంభించే ముందు గణపతిని పూజించినట్టు రుగ్వేదం చెబుతోంది. బ్రహ్మవైవర్తన పురాణంలో ‘గణ’ శబ్ధానికి విజ్ఞానమని, ‘ణ’ అంటే తేజస్సు అని పేర్కొన్నారు. ఇక పంచమ వేదంగా చెప్పుకునే మహాభారతాన్ని రచించిన వేదవ్యాసుడు తన లేఖకుడిగా గణపతిని నియమించాడు. గణనాథుడు జయకావ్యాన్ని అద్భుతంగా రాయడంతో దానిని తమ దగ్గరే ఉంచుకోవాలని దేవతలు తస్కరించారంటారు.

Read Also: వినాయక చవితి వ్రత కథ, పూజా విధానం

ప్రపంచమంతా గణాలతో కూడుకుని ఉంది. అలాంటి గణాలు అన్నీకలిస్తేనే ఈ ప్రపంచం.. అట్టి ప్రపంచాన్ని అహంకారానికి చిహ్నమైన మూషికాన్ని అధిరోహించి పాలించే ప్రభువు ఈ మహాగణపతి. మహా గణపతి, హరిద్రా గణపతి, స్వర్ణ గణపతి, ఉచ్చిష్ట గణపతి, సంతాన గణపతి,నవనీత గణపతి అని ఆరు రూపాల్లో పూజిస్తారు. అలాగే ప్రపంచం వ్యాప్తంగా ప్రాంతాలను బట్టి భిన్న రూపాలతో విఘ్నాధిపతిని ఆరాధిస్తారు. విశ్వరూప ప్రజాపతి సిద్ధి, బుద్ధి అనే తన ఇద్దరు కుమార్తెలను గణపతికిచ్చి వివాహం చేశారు. వారికి క్షేముడు, లాభుడు అనే కుమారులు జన్మించారు. అందుకే గణేశుడి ఆరాధన వల్ల క్షేమం, లాభం కలుగుతుందని ప్రతీతి.

విఘ్నేశ్వరుని ఇంటిలో పూజించేవారు ముందు రోజే మట్టి విగ్రహాలను తీసుకురావాలి. అమృత ఘడియలు, శుభ కాలంలో వినాయకుడి విగ్రహాన్ని ఇంటికి తీసుకొస్తే మంచి జరుగుతుందని పండితులు పేర్కొంటున్నారు. ఆగస్టు 31 ఉదయం 9.45 నుంచి మధ్యాహ్నం 12.47, సాయంత్రం 4.00 నుంచి 6.00, తిరిగి రాత్రి 8.37 నుంచి 956. గంటల మధ్య శుభకాలం. ఈ సమయంలో ప్రతిమలను ఇంటికి తీసుకురావాలట.

Read Also: వినాయక విగ్రహాలు పగలగొట్టడం.. ఈ ఫోటో వెనుక ఇంతటి చరిత్ర ఉందా?

సెప్టెంబరు 2 తెల్లవారుజామున 1.56 గంటల తర్వాత చవితి ప్రారంభమై అదే రోజు రాత్రి 1.53 వరకు ఉంటుంది. కాబట్టి సెప్టెంబరు 2 సోమవారం ఉదయం నుంచే గణపతిని పూజించుకోవచ్చని అంటున్నారు. అయితే వినాయకుడి జననం మధ్యాహ్నం సమయంలో జరిగిందని బలంగా నమ్ముతారు కాబట్టి ఉదయం 11.05 నుంచి 1.36 గంటల మధ్య పూజకు అనుకూలమై కాలమని పౌరోహితులు తెలియజేస్తున్నారు. అయితే, 9.25 నుంచి మధ్యాహ్నం 12.22 మధ్య శుభసమయం ఉందని పేర్కొంటున్నారు. దుర్ముహూర్తం మధ్యాహ్నం 12.32 నుంచి 1.21 తిరిగి మధ్యాహ్నం 3.00 నుంచి 3.50 వరకు ఉంది. ఉదయం 8.55 నుంచి రాత్రి 9.05 మధ్య చంద్రుని చూడరాదని అంటున్నారు.