Kumbh Mela: దారులన్నీ గంగ ఒడికే.. ప్రత్యేక ఆకర్షణగా నాగా సాధువులు

కుంభమేళా ప్రారంభమైన నేపథ్యంలో గంగా నదిలో పవిత్ర స్నానాలు ఆచరించేందుకు భక్తులు పోటెత్తారు. నాగా సాధువులు, సాధ్విలు ప్రత్యేక ఆకర్షణగా నిలిచారు. ఉత్తరప్రదేశ్‌లోని ప్రయాగ్‌రాజ్‌ (అలహాబాద్)లో కుంభమేళా అట్టహాసంగా సాగుతోంది. మకర సంక్రాంతి పర్వదినాన ప్రయాగ్‌రాజ్‌లో అర్ధకుంభమేళా మహాక్రతువు ప్రారంభమైంది. త్రివేణి సంగమంలో మంగళవారం (జనవరి 15) ఉదయం 5.15 గంటలకు మొదటి రాజయోగ స్నానాలతో ప్రారంభమైన ఈ కుంభమేళా మార్చి 4 వరకు 45 రోజుల పాటు కొనసాగనుంది.

ప్రయాగరాజ్ కుంభమేళాను యునెస్కో (UNESCO) ‘సాంస్కృతిక వారసత్వ సంపద’గా గుర్తించిన విషయం తెలిసిందే. ఇలాంటి ఘనత ఉన్న కుంభమేళాకు పిల్లలు, పెద్దలు అనే తేడా లేకుండా అందరూ తరలివస్తున్నారు. ప్రపంచం నలుమూలల నుంచి యాత్రికులు పోటెత్తారు.

కేంద్ర మంత్రి స్మృతి ఇరానీ కూడా ప్రయాగ్‌రాజ్‌లో పవిత్ర స్నానమాచరించారు. రామ మందిర నిర్మాణాన్ని కాంక్షిస్తూ భక్తులు 33 వేల దీపాలను వెలిగించారు. కుంభమేళా పూర్తవగానే మందిరం నిర్మాణం ప్రారంభమవుతుందని సాధువులు చెప్పారు.

భక్తులకు ఎలాంటి ఇబ్బందులు తలెత్తకుండా యోగి సర్కార్ ఏర్పాట్లు చేసింది. ఈ కుంభమేళాకు 192 దేశాల నుంచి 12 కోట్లకు పైగా భక్తులు వస్తారని అంచనా. స్నానఘట్టాల వద్ద ఎలాంటి అవాంఛనీయ సంఘటనలు జరగకుండా పోలీసులు, పారామిలటరీ బలగాలు భారీగా మోహరించాయి. దాదాపు 20 వేల మంది పోలీసులు భద్రతా విధుల్లో పాల్గొంటున్నారు. దాదాపు లక్ష బయో పోర్టబుల్‌ టాయిలెట్స్‌ను ఏర్పాటు చేశారు. పరిసర ప్రాంతాలను ఎప్పటికప్పుడు శుభ్రం చేసేందుకు 25 వేల మంది పారిశుద్ధ్య కార్మికులను నియమించారు.


సోమవారం ఒక్క రోజే 35 లక్షల మందికి పైగా భక్తులు పుణ్యస్నానాలు చేసినట్లు అధికారులు వెల్లడించారు. భక్తుల కోసం 5.5 కిలో మీటర్ల మేర 35 స్నాన ఘట్టాలను ఏర్పాటు చేశారు. కుంభమేళాలో ఈసారి అక్షయ్‌ వాత్‌, సరస్వతి కూప్‌ల వద్ద భక్తులకు పూజలు చేసుకునే అవకాశం కల్పిస్తున్నారు. 450 ఏళ్ల కుంభమేళా చరిత్రలో ఈ అవకాశం కల్పించడం ఇదే తొలిసారి.