మైసూర్ రాజకుటుంబంలో విషాదం.. ప్యాలెస్‌లో దసరా వేడుకలు రద్దు

దసరా పండుగ పేరెత్తగానే మైసూరు గుర్తొస్తొంది. మైసూరు రాజకుటుంబీకుల ఆధ్వర్యంలో నగరంలో విజయ దశమి వేడులకు అంగరంగ వైభవంగా నిర్వహిస్తారనే సంగతి తెలిసిందే. ఈ వేడుకల కోసం విద్యుత్ దీపాలతో మైసూర్ ప్యాలెస్‌ను అందంగా అలంకరిస్తారు. దసరా ఉత్సవాలను చూసేందుకు దేశ విదేశాల నుంచి పర్యాటకులు మైసూర్ వెళ్తుంటారు. కానీ ఈ దసరా పూట మైసూరు రాజకుటుంబంలో విషాదం చోటు చేసుకుంది.

రాజమాత ప్రమోద దేవి తల్లి పుట్టచిన్నమ్మణ్ణి (98) శుక్రవారం కన్నుమూశారు. గత కొంత కాలంగా వయోభారంతో బాధపడుతున్న ఆమె ఆసుపత్రిలో చికిత్స పొందుతూ తుది శ్వాస విడిచారు. దీంతో మైసూర్ ప్యాలెస్‌లో నిర్వహించే దసరా సంబరాలను రద్దు చేశారు. కానీ రాష్ట్ర ప్రభుత్వం నిర్వహించే జంబూ సవారీ యథావిధిగా సాగనుంది. ముఖ్యమంత్రి హెచ్‌డీ కుమారస్వామి శుక్రవారం మధ్యాహ్నం ఈ వేడుకలను ప్రారంభిస్తారు.