లలితా త్రిపుర సుందరిగా బెజవాడ దుర్గమ్మ

విజయవాడలోని ఇంద్రకీలాద్రిపై కనకదుర్గగా కొలువుదీరిన జగన్మాత ఆలయంలో శరన్నవరాత్రులు అంగరంగ వైభవంగా సాగుతున్నాయి. నాలుగో రోజు లలితాత్రిపుర సుందరిదేవి అలంకారంలో అమ్మవారు దర్శనమిస్తున్నారు. త్రిపురాత్రయంలో లలితాత్రిపుర సుందరి రెండో శక్తి. దేవీ ఉపాసకులకు ముఖ్యదేవత. త్రిగుణాతీతమైన కామేశ్వర స్వరూపంలో నాలుగో రోజున దర్శనమిస్తున్నారు. లక్ష్మీ సరస్వతులు ఇరువైపులా నిలబడి వింజామరలు వీస్తుండగా శ్రీచక్ర అధిష్ఠాన శక్తిగా అమ్మ కొలువుదీరింది. చెరుకుగడ, విల్లు, పాశాంకుశాలను ధరించి భక్తులకు వరాలను అనుగ్రహిస్తోంది. లలితాదేవి విద్యా స్వరూపిణి. మాంగల్య సౌభాగ్యాన్ని ప్రసాదిస్తుంది. దేవి అనుగ్రహం కోసం సువాసినీ పూజ చేస్తారు. సమస్త సుఖాలు ప్రసాదించే శక్తి స్వరూపిణి లలితాదేవి.

జగన్మాతయే లలితాదేవిగా ఆశ్వయుజ మాసంలో పూజలందుకుంటోంది. ప్రతిప్రాణిలో ఉండే శక్తే చైతన్య స్వరూపిణి ఆదిపరాశక్తి. దీనినే నారాయణీ స్తుతి ‘త్వయైకయా పూరిత మంబయైతత్’ అంటూ ధృవపరిచింది. శివవిష్ణు సహస్ర నామాలకంటే ఒక్కసారి అమ్మను మనసార ధ్యానిస్తే చాలు అపారమైన కరుణ లభిస్తుంది. అమ్మను పూజించినవారికి పునర్జన్మ ఉండదు. ఇక లలితాత్రిపుర సుందరిదేవి అలంకారంలో దుర్గమ్మను దర్శించుకునేందుకు తెల్లవారుజాము నుంచే భక్తులు బారులు తీరారు. మరోవైపు కర్నూలు జిల్లాలోని శ్రీశైలం పుణ్యక్షేత్రంలో శరన్నవరాత్రి ఉత్సవాలు కన్నుల పండువగా జరుగుతున్నాయి. నాలుగో రోజు భ్రమరాంబదేవి కుష్మాండదుర్గ అలంకారంలో భక్తులకు దర్శనమిస్తున్నారు.