శబరిమల: సుప్రీం తీర్పును వెనుకేసుకొచ్చిన ఆ ఆశ్రమం కాలిబూడిదయ్యింది!

శబరిమల అయ్యప్ప ఆలయంలోకి అన్ని వయసుల మహిళలకు ప్రవేశం కల్పించాలని సుప్రీంకోర్టు గత నెలలో ఇచ్చిన తీర్పును సమర్థించినందుకు కేరళలోని ఓ ఆశ్రమం భారీమూల్యమే చెల్లించుకుంది. తిరువనంతపురం శివారులోని కుందమాన్‌కదువలో ఉన్న సాలగ్రామం ఆశ్రమంపై శనివారం తెల్లవారుజామున గుర్తుతెలియని వ్యక్తులు దాడిచేసి నిప్పటించారు. వివాదస్పద ఆధ్యాత్మిక గురువు స్వామి సందీపానందగిరి, భగవద్గీత స్కూల్ డైరెక్టర్ ఆశ్రమానికి నిప్పంటించి సర్వనాశనం చేశారు. ఆశ్రమంలోకి చొరబడిన గుర్తుతెలియని వ్యక్తులు దాడికి పాల్పడి, ఆవరణలో ఉన్న రెండు కార్లు, ఒక ద్విచక్ర వాహనానికి నిప్పటించి కాల్చి బూడిద చేశారు. సుమారు తెల్లవారుజామున 2.50 గంటల ప్రాంతంలో నిరసనకారులు ఆశ్రమంలోకి ప్రవేశించినట్టు సమాచారం.

ఈ ఘటన గురించి సమాచారం అందుకున్న పోలీసులు ఆశ్రమానికి పరిస్థితిని సమీక్షించారు. దీనిపై కేసు నమోదు చేసి దర్యాప్తు చేపట్టారు. ఇటీవల శబరిమల వివాదంపై స్వామి సందీపానందగిరి చేసిన వ్యాఖ్యలతో భక్తుల తీవ్ర ఆగ్రహం వ్యక్తం చేశారు. సుప్రీంకోర్టు తీర్పును సమర్ధిస్తూ మాట్లాడినందుకు అయ్యప్ప భక్తులు, హిందూ సంస్థలు ఆయన వైఖరిపై మండిపడ్డాయి. అలాగే శబరిమల తీర్పుపై సామాజిక మాధ్యమాలు, టీవీ చర్చల్లోనూ సందీపానందగిరి చేసిన వ్యాఖ్యలు తీవ్ర కలకలం రేపాయి. దీంతో సందీపానంద గిరికి పలువురి నుంచి హెచ్చరికలు, బెదిరింపులు మొదలయ్యాయి.

మరోవైపు సందీపానందగిరి ఆశ్రమం దాడులపై కేరళ ముఖ్యమంత్రి పినరయ్ విజయన్ స్పందించారు. భౌతిక దాడులతో ఆలోచనలను, సమాజంలో జరిగే మార్పులను మార్చలేమని అన్నారు. చట్టాన్ని చేతుల్లోకే తీసుకునే అధికారాన్ని ఎవరికీ ఇవ్వబోమని ఆయన స్పష్టం చేశారు. ఈ దాడికి పాల్పడిన వారికి శిక్ష తప్పదని హెచ్చరించారు. సాలగ్రామం పబ్లిక్ చారిటబుల్ ట్రస్ట్, భగవద్గీత స్కూల్‌ను స్థాపించిన సందీపానందగిరి కేరళలో ప్రముఖ ఆధ్యాత్మిక గురువుగా గుర్తింపు పొందారు. ఆధ్యాత్మిక, సామాజిక కార్యక్రమాలతోనే కాదు వివాదాలతోనూ ఆయన నిరంతరం వార్తల్లో నిలుస్తుంటారు. తాజాగా శబరిమల వివాదంపై నోరుజారి భక్తుల ఆగ్రహాన్ని చవిచూశారు.