ఉగాది రోజు పంచాంగ శ్రవణం... ప్రయోజనం ఏంటి?

తెలుగు సంవత్సరాల ప్రకారం చైత్రమాసంలోని పాడ్యమితో కొత్త ఏడాది ప్రారంభమవుతుంది. కాబట్టి ఈ రోజునే ఉగాది పండుగ జరుపుకుంటారు. దీని వల్ల కాలాన్ని లెక్కించడానికి వీలవుతుందని పురాతన కాలంలో పండితులు నిర్ణయించారు. ఉగాది వేళ ఘడియలు, గంటలు, రోజులు, వారాలు, పక్షాలు, నెలలు, రుతువులు, ప్రాణులు కాలస్వరూపమైన ఏడాదిలో నివసిస్తుంటాయి.

ఉగాది నాడు ముఖ్యమైంది పంచాంగ శ్రవణం. దీన్ని ఈరోజే నిర్వహించడానికి తెలుగు సంవత్సరాది ప్రారంభమయ్యేది ఆ పర్వదినంతోనే కాబట్టి. ఉగాది రోజున ఆలయంలోగానీ, ఓ ఆధ్యాత్మిక ప్రదేశంలో గానీ పండితుల సమక్షంలో పంచాంగ శ్రవణం నిర్వహిస్తారు. రాశి ఫలాలు, గ్రహస్థితులు ఎలా ఉన్నాయో తెలుసుకుని ఏవైనా దోషాలుంటే వాటి నివారణకు పూజలు నిర్వహించి ఇబ్బందులు తొలగించుకోడానికే పంచాంగ శ్రవణం చేస్తారు.

అలాగే పంచాంగ శ్రవణంలో తిథి, వార, నక్షత్ర, యోగ కరణ ఫలితాన్ని తెలుసుకోవడం ద్వారా గంగానదిలో స్నానం చేసినంత పుణ్యాన్ని పొందుతామనేది పెద్దల నమ్మకం. ఉగాది నాడు పంచాగ శ్రవణం చేసేవారికి సూర్యుడు శౌర్యాన్ని, చంద్రుడు ఇంద్ర సమాన వైభవాన్ని, కుజుడు శుభాన్ని, శని ఐశ్వర్యాన్ని, రాహువు బాహుబలాన్ని, కేతువు కులాధిక్యత ప్రసాదిస్తారని పురాణాల్లో పేర్కొన్నారు.

ఇక పంచాంగ శ్రవణంలోని పంచ అంగాలైన, తిథి సంపదను, వారం ఆయుష్షును, నక్షత్రం పాపప్రక్షాళనను, యోగం వ్యాధి నివారణను, కరణం గంగాస్నానం చేసినంత పుణ్యఫలాన్ని అందిస్తుందని పలువురి విశ్వాసం. అంతే కాకుండా ఆ ఏడాది వర్షపాతం ఎలా ఉండబోతుంది? పంటలు పరిస్థితేంటి? ఏరువాక ఎలా సాగుతుంది? అనే విషయాలను రైతులు తెలుసుకోడానికి ఇది ఉపయోగపడుతుంది.