కృష్ణ జన్మాష్టమి ముహూర్తం..
శ్రావణ మాసంలోని కృష్ణ పక్షం అష్టమి తిథిన కృష్ణుడు అవతరించాడు. రోహిణి నక్ష్తత్రం లగ్నమందు అర్ధరాత్రి సమయాన దేవకి-వసుదేవుడు దంపతులకు జన్మించాడు. ఈ ఏడాది ఆగస్టు 11 ఉదయం 9.07 గంటల నుంచి ఆగస్టు 12 ఉదయం 11.16 గంటల వరకు అష్టమి తిథి కొనసాగుతుంది. ఈ మధ్య కాలంలో మనం కృష్ణుడిని ఆరాధించడం శుభసూచకం. నేడు శ్రీ కృష్ణుడికి అత్యంత పర్వదినం. ఈ రోజు చిన్ని కృష్ణుడిని భక్తితో ఆరాధిస్తే సకల శుభాలు కలుగుతాయని పురాణాలు పేర్కొన్నాయి. పురాణాల ప్రకారం ఇప్పటికీ శ్రీ కృష్ముడు జన్మించి 5246 సంవత్సరాలైందని అంచనా.
శ్రీ కృష్ణాష్టమి రోజు పూజా విధానం..
ఈ రోజు వేకువ జామున నిద్ర లేచి అన్ని పనులు పూర్తి చేసుకోవాలి. తలంటి స్నానం చేసి పసుపు రంగు బట్టలు ధరించాలి. ఇంటిని శుభ్రం చేసుకుని ఆవుపేడతో ఇంటి ముందు కల్లాపి జల్లి రంగు వల్లు తీర్చిదిద్దాలి. గడపకు పసుపు కుంకుమతో పూజించి గుమ్మాలకు తోరణాలు కట్టాలి. చిన్ని కృష్ణుడు వస్తున్నట్లుగా పాదాలు చిత్రించుకోవాలి. మధ్యాహ్నం 12 గంటలకు మాధవుడి పూజ ప్రారంభించడం మంచిది. బాలకృష్ణుడి విగ్రహం ముందు ఐదు ఒత్తులతో దీపాన్ని వెలిగించి ఓం శ్రీ కృష్ణ పరబ్రహ్మణే నమః అనే మంత్రాన్ని 108 సార్లు పఠించాలి.
మూడు ఆరాధనలు..
చిన్ని కృష్ణుడిని 3 రకాలుగా ఆరాధిస్తారు. సూర్యోదయానికి ముందు, మధ్యాహ్నం వేళ, అర్ధరాత్రి సమయంలో ఆయనకు పూజలు చేస్తారు.
మొదటి ఆరాధన: ఈ రోజు సూర్యోదయానికి ముందే కృష్ణుడిని పూజిస్తారు. ముఖ్యంగా ఉపవాసం చేసేవారు చిన్ని కృష్ణుడిని ఆరాధిస్తారు.
రెండో ఆరాధన: మధ్యాహ్నం 12 గంటలకు ఈ పూజను ప్రారంభిస్తారు. మొదట నీరు తీసుకుని దేవకికి అర్పిస్తారు. తల్లి దేవకిని పూజించిన తర్వాత మాధవుడికి ప్రత్యేకంగా పూజ చేయాలి.
మూడో ఆరాధన: ఇది అత్యంత ముఖ్యమైన పూజ. అర్ధరాత్రి 12 గంటల తర్వాత జరుగుతుంది. ఎందుకంటే ఆ మురళీ కృష్ణుడు జన్మించింది అర్ధరాత్రే. ఈ సమయంలో చిన్ని కృష్ణుడిని ఆరాధిస్తారు. తమ కోరికలను నియంత్రించుకుని అర్ధరాత్రి తర్వాత ఉపవాసం మానేస్తారు.
ఏమేమి అర్పించాలంటే..
కృష్ణుడికి వివిధ రకాల నైవేద్యాలు సమర్పిస్తారు. మొత్తం 56 రకాల నైవేద్యాలను అర్పిస్తారు. అయితే అందరికి 56 రకాల వంటలను ఆయనకు ఇవ్వడం కష్టం. కాబట్టి దీని గురించి మీరు ఆందోళన చెందాల్సిన పనిలేదు. వీటి స్థానంలో వెన్నతో తయారు చేసి ఏదైన తీపి వంటకం లేదా వెన్నను శ్రీ కృష్ణుడికి సమర్పించవచ్చు. ఎందుకంటే కన్నయ్యకు వెన్నంటే అమితమైన ఇష్టం. ఫలితంగా మీరు ఎల్లప్పుడు సంతోషంగా ఉంచడమే కాకుండా ఆ మాధవుడు మీ కోరికలను తీరుస్తాడు.
ఉపవాసం..
ఈ రోజు ముఖ్యంగా ఉపవాసం ఉండి రాత్రికి శ్రీ కృష్ణుడీ లీలలు, కథలతో జాగరణ చేసి మరుసటి రోజు భోజనం చేయాలి. అంతేకాకుండా స్వామికి సంబంధించి అష్టోత్తరం, బాలకృష్ణ స్తోత్రం, శ్రీ కృష్ణ సహస్రనామాలు, భాగవతంలోని దశమస్కందం చదవాలి. ఆలయంలో ఆష్టోత్తర పూజ, కృష్ణ సహస్రనామ పూజ చేస్తే వారికి వంశాభివృద్ధి, ఐశ్వార్యాలు చేకూరుతాని పండితులు తెలియజేస్తున్నారు. స్కందపురాణం ప్రకారం ఈ రోజు మాధవుడిని అర్చిస్తే సకల పాపాలు తొలిగి మోక్షం లభిస్తుంది.