వీడియో: కనువిందు చేస్తున్న ఖైరతాబాద్ సప్తముఖ మహాగణపతి

వినాయక చవితి ఉత్సవాలు అనగానే మనకు గుర్తొచ్చేది ఖైరతాబాద్ గణపతి. ఏటా ఈ వినాయకుడి గురించి తెలుగు రాష్ట్రాల ప్రజలు తెగ ఆసక్తి కనబరుస్తారు. ‘బడా గణపతి’గా పేరు గడించిన మన ఖైరతాబాద్ గణపతి దేశంలోనే కాదు.. ప్రపంచవ్యాప్తంగానూ ఖ్యాతి గడించారు. ఖైరతాబాద్ గణపతి విగ్రహం తయారీ నుంచి మొదలు పెడితే నవరాత్రి పూజలు, లడ్డూ, భక్తుల కోలాహలం, నిమజ్జనం అన్నీ ప్రత్యేకమే.

ఏటా వైవిధ్య రూపాల్లో దర్శనమిచ్చే మన బడా గణపతి ఈసారి శ్రీ సప్తముఖ కాలసర్ప మహాగణపతిగా దర్శనమివ్వనున్నారు. ఆ ఆసక్తికర రూపాన్ని వీడియోలో వీక్షించవచ్చు.

గణేశ్ ఉత్సవాలు ప్రారంభమై 2015 నాటికి 60 ఏళ్లు పూర్తయ్యాయి. ఈ నేపథ్యంలో ఖైరతాబాద్ మహాగణపతి నిర్వాహకులు 60 అడుగుల ఎత్తైన విగ్రహాన్ని రూపొందించారు. ఆ తర్వాత ఏడాది నుంచి ఒక్కో అడుగు తగ్గిస్తూ వస్తున్నారు. ఈ ఏడాది 57 అడుగుల ఎత్తు, 24 అడుగుల వెడల్పుతో మహాగణపతిని రూపొందించారు. ఏడు తలలు, 14 చేతులు, తలలపై సర్పాలతో ఖైరతాబాద్ గణపతి కనువిందు చేస్తున్నారు. మరి ఇంకెందుకు ఆలస్యం దర్శించి తరించడానికి త్వరపడండి!