రావణుడికి సీత కూతురే కానీ....

రామాయణంలోని ముఖ్యమైన పాత్రల్లో సీత కూడా ఒకరు. అలూమగల అనురాగానికి పోలికగా సీతారాములను పేర్కొంటారు. అన్యోన్యంగా ఉండే దంపతులను చూస్తే సీతారాముల్లా ఉన్నారని ఉదహరిస్తారు. అయితే రామాయణంలో వివిధ అంశాలు గురించి చాలా మందికి తెలియదు. రామాయణాన్ని తొలిసారిగా సంస్కృతంలో వాల్మీకి మహర్షి రాశాడు. అయితే తులసీదాస్ తన సొంత శైలిలో రామాయణంలోని కొన్ని భాగాలను ఆకర్షణీయంగా తీర్చిదిద్దాడు.

ఇదే కాకుండా రామయాణాన్ని 300 విధాలుగా వివిధ వ్యక్తులు సంకలనం చేశారు. ఇవన్నీ రాముడు, సీత, రావణుడు గురించి వివరించినా, చెప్పే విధానంలో మాత్రం కొంచెం తేడా ఉంది.వాల్మీకి రామాయణం ప్రకారం జనక మహరాజుకు సీత పెంపుడు కూతురు. సాక్షాత్తు లక్ష్మీదేవి అవతారమైన జానకి 14 ఏళ్లు ప్రవాసంలో ఉంది. భర్త వెంట అడవులకు వెళ్లిన ఆమె సహనంలోనూ భూదేవిని మించిపోయిందని అంటారు. మిగతా వాళ్లు రాసిన రామాయణంలో మాత్రం జానకి పుట్టుక నుంచి మరణం వరకు ఎన్నో కొత్త కొత్త విషయాలను చర్చించారు.

జైన మతానికి చెందిన సంఘదాసు రాసిన అద్భుత రామాయణంలో రావణుడు, మండోదరికి జన్మించిన మొదటి సంతానంగా సీతను పేర్కొన్నారు. అయితే సీత జన్మించిన తర్వాత మొదటి సంతానం వల్ల లంకాధీశునికి మరణం తథ్యమని జ్యోతిషులు హెచ్చరించారట. ఇది విన్న రావణుడు ఆమెను లంకకు దూరంగా తీసుకుపోయి భూమిలో పాతిపెట్టమంటూ తన అనుచరులను ఆఙ్ఞాపించాడు. లంకేశ్వరుడి ఆఙ్ఞ ప్రకారం ఆయన సైన్యం సీతను భూమిలో పాతిపెట్టారు. ఆ తర్వాత భూమిలో నుంచి దొరికిన సీతను జనకుడు తన కుమార్తెగా ప్రకటించాడు.

రావణుడు నిజమైన సీతను అపహరించలేదని కొంత మంది రాసిన పుస్తకాల్లో ఉంది. లంకాధిపతి అపహరణకు వచ్చిన సమయంలో ఆమె స్థానంలో మాయ సీత అక్కడ ఉందట. రామరావణ యుద్ధం ముగిసినంత వరకు పార్వతి రక్షణలోనే సీత ఉందట. ఈ మాయ సీతే ద్వాపర యుగంలో ద్రౌపదిగా జన్మించింది. సీత దక్షిణ నేపాల్‌ ప్రాంతం మిథిల రాజ్యంలోని జనకపురంలో జన్మించిందని కొందరు పేర్కొంటే, బీహార్‌లోని సీతామర్హిలో పుట్టిందని కొందరు వాదిస్తున్నారు.

శ్రీమహా విష్ణువును భర్తగా పొందాలని ఘోర తపస్సు చేస్తోన్న వేదవతి అందానికి మోహించిన రావణుడి ఆమెను సొంతం చేసుకోడానికి ప్రయత్నిస్తాడు. దీంతో తీవ్ర ఆగ్రహం చెందిన వేదవతి వచ్చే జన్మలో నా కారణంగా నీవు మరణిస్తావని రావణుడిని శపించి అగ్నికి ఆహుతవుతుంది. ఆ వేదవతే త్రేతాయుగంలో సీతగా పుట్టిందని కొందరంటారు.