​ అంతర్జాలంలో అన్నమయ్య కీర్తనలు!

కలియుగ ప్రత్యక్ష దైవం శ్రీ వేంకటేశ్వరస్వామి వైభవాన్ని, మహత్మ్యాన్ని, తత్వాన్ని సంకీర్తనల ద్వారా వ్యాపింపజేసిన మహనీయుడు తాళ్లపాక అన్నమాచార్యులు. ఆ మహానీయుడు సంకీర్తనలను ప్రపచం వ్యాప్తంగా ఉన్న భక్తులకు చేరవేసేందుకు తిరుమల తిరుపతి దేవస్థానములు విశేష కృషి చేస్తోంది. దీనిలో భాగంగా అన్నమయ్య సాహిత్యం పేరుతో టీటీడీ దేవస్థానం వెబ్‌సైట్‌లో ఉంచిన సమాచారం భక్తులకే కాదు పరిశోధకులకు కూడా ఎంతగానో ఉపయోగపడుతోంది.

పదకవితా పితామహుడు అన్నమయ్య రచించిన 32 వేల సంకీర్తనల్లో లభ్యమైన 14 వేల కీర్తనలను 1935 నుంచి 1965 వరకు 32 సంపుటాలలో ముద్రించారు. వీటిలో 21 సంపుటాలు ఆధ్యాత్మిక సంకీర్తనలుగానూ, 11 సంపుటాలు శృంగార సంకీర్తనలుగాను విభజించారు. ఏ సంపుటంలో ఏ కీర్తన ఉందో తెలుసుకోవడం కష్టతరంగా ఉండేది. ఈ ప్రయత్నం ద్వారా ఈ ఇబ్బంది తొలగిపోనుంది. కీర్తనలోని సాహిత్యం ఏ సంపుటంలో ఉందో సులభంగా తెలుసుకోవచ్చు. తామర రేకుల్లోని వరుస సంఖ్యతో ఈ వివరాలను తెలుసుకోవచ్చు.

ముద్రించిన 29 సంపుటాలను స్కాన్ చేసి అందరికీ అనుకూలంగా ఉండే పిడిఎఫ్‌ ఫార్మాట్‌లో తిరుమల తిరుపతి దేవస్థానం అంతర్జాలంలో ఉంచింది. ఆధ్మాత్మిక, శృంగార సంకీర్తలను వేరుచేసి అ కారం క్రమంలో నిక్షిప్తం చేసే ప్రయత్నం చేస్తోంది. సంకీర్తనలను యూనికోడ్‌లో పొందుపరచడం వల్ల సులభంగా చదవడంతో పాటు ఇతర భాషల్లోకి అనువదించేందుకు వీలవుతుంది. ఈ ప్రాజెక్ట్ కోసం తితిదే ఐటి విభాగం, టిసిఎస్‌తో కలిసి పనిచేస్తోంది. సంగీతం గురించి ఙ్ఞానంలేని వారు కూడా ఈ కృతులను వినేందుకు వీలుగా ప్రముఖ పండితులతో త్వరలో సంకీర్తనా పఠనం చేయించనుంది. అంతే కాదు వీటిని డౌన్‌లోడ్ చేసుకునే అవకాశాన్ని కల్పిస్తోంది.