మే 17 నుంచి పద్మావతి అమ్మవారికి వసంతోత్సవాలు

సిరులతల్లి తిరుచానూరు శ్రీ పద్మావతి అమ్మవారి వార్షిక వసంతోత్సవాలు మే 17 నుంచి 19 వరకు అత్యంత వైభవంగా జరగనున్నాయి. ఇందు కోసం మే 16న అంకురార్పణం జరుగుతుంది. ఉత్సవాల్లో భాగంగా మే 18న ఉదయం స్వర్ణ రథోత్సవంపై అమ్మవారు ఊరేగుతారు. మూడు రోజులపాటు మధ్యాహ్నం 2.30 నుంచి 4.00 గంటల వరకు శుక్రవారపు తోటలో అమ్మవారి ఉత్సవర్లకు స్నపనతిరుమంజనం నిర్వహించనున్నారు. అలాగే రాత్రి 7.30 నుంచి 8.30 గంటల వరకు ఆలయ నాలుగు మాడ వీధుల్లో అమ్మవారిని ఘనంగా ఊరేగించనున్నారు.

ఈ ఉత్సవాల్లో భక్తులు పాల్గొనే అవకాశాన్ని టీటీడీ కల్పించింది. గృహస్తులు ఒక్కొక్కరు రూ.150 చెల్లించి వసంతోత్సవంలో పాల్గొనవచ్చు. ఈ సేవలో పాల్గొన్న భక్తులకు లడ్డూ, వడ అందజేస్తారు. వసంతోత్సవం సందర్భంగా ఆలయంలో మూడు రోజుల పాటు ఆర్జిత సేవలైన కల్యాణోత్సవం, ఊంజలసేవను రద్దు చేశారు. అదేవిధంగా మే 17న లక్ష్మీపూజ, మే18న సామవేద పుష్పాంజలిసేవలను టీటీడీ రద్దు చేసింది. ఆలయం వద్దనున్న ఆస్థాన మండపంలో రోజూ సాయంత్రం అన్నమాచార్య ప్రాజెక్టు ఆధ్వర్యంలో భక్తి సంగీత కార్యక్రమాలు నిర్వహించనున్నారు. హిందూ ధర్మప్రచార పరిషత్‌ ఆధ్వర్యంలో కళాకారులతో భజనలు, కోలాటాలు ఏర్పాటు చేయనున్నారు.

కాగా, పద్మావతీ అమ్మవారి వార్షిక వసంత్సోవాలను పురస్కరించుకొని ఆలయంలో కోయిల్‌ ఆళ్వార్‌ తిరుమంజనం మే 14న నిర్వహిస్తారు. ఇందులో భాగంగా ఉదయం సుప్రభాతంతో అమ్మవారిని మేల్కొలిపి ఉదయం 6.00 నుంచి 8.30 గంటల వరకు కోయిల్‌ ఆళ్వార్‌ తిరుమంజనం జరుగుతుంది. ఆలయ ప్రాంగణం, గోడలు, పైకప్పు, పూజాసామగ్రి తదితర అన్ని వస్తువులను శుద్ధి చేయనున్నారు. అనంతరం నామకోపు, శ్రీచూర్ణం, కస్తూరి పసుపు, పచ్చాకు, గడ్డ కర్పూరం, గంధం, కుంకుమ, కిచీలీగడ్డ తదితర సుగంధ ద్రవ్యాలు కలగలిపిన పవిత్రజలాలతో సంప్రోక్షణం చేస్తారు. అనంతరం ఉదయం 9.00 గంటల నుంచి భక్తులను అమ్మవారి దర్శనానికి అనుమతిస్తారు. కోయిల్‌ ఆళ్వార్‌ తిరుమంజనం సందర్భంగా ఆర్జితసేవలను రద్దు చేసింది.