శ్రీనివాసుడి లడ్డూ ప్రసాదానికి లైసెన్స్

తిరుమలలో స్వామివారి దర్శనానికి ఎంత విశేషం ఉందో, లడ్డూ ప్రసాదానికి కూడా అంతే ప్రాధాన్యత ఉంది. వెంకన్న ప్రసాదం అనగానే ముందుగా గుర్తుకు వచ్చేది లడ్డునే మరి. ఎవరైనా తిరుపతి వెళ్తున్నారంటే తమకోసం ప్రత్యేకంగా ఓ లడ్డూ తీసుకురావాలని అంటారు. ప్రపంచ ప్రఖ్యాతి పొందిన ఈ లడ్డు ప్రసాదానికి కొత్త లైసెన్స్‌ లభించింది. ఫుడ్‌ సేఫ్టీ అండ్‌ స్టాండర్డ్‌ అథారిటీ ఆఫ్‌ ఇండియా నుంచి తిరుమల తిరుపతి దేవస్థానం ఈ లైసెన్స్‌‌ను పొందింది. అయితే, గతంలో లైసెన్స్‌ అవసరం లేదని టీడీపీ అధికారులు తేల్చి చెప్పిన విషయం తెలిసిందే.

బెంగళూరుకు చెందిన హక్కుల కార్యకర్త నరసింహమూర్తి గతంలో లడ్డు నాణ్యతపై ఫుడ్‌ అండ్‌ సేఫ్టీ అధికారులకు ఫిర్యాదు చేశారు. తిరుమల దేవస్థానం తయారు చేస్తున్న లడ్డూల్లో నాణ్యత లేదని, తయారీలో ఎఫ్ఎస్ఎస్ఏఐ నిబంధనలను పాటించడం లేదని ఆరోపిస్తూ నరసింహమూర్తి ఫిర్యాదు చేశారు. ఈ ఫిర్యాదుపై టీటీడీ వివరణ ఇచ్చినప్పటికీ ఫుడ్ సేఫ్టీ అండ్ స్టాండర్డ్ అథారిటీ ఆఫ్ ఇండియా సంతృప్తి చెందలేదు. తక్షణమే ఎఫ్‌ఎస్‌ఎస్‌ఎస్‌ఏ నిబంధనల ప్రకారం లడ్డూ తయారు చేయాలంటూ టీటీడీతో పాటు ఆంధ్రప్రదేశ్ ప్రభుత్వానికి సూచనలు చేసింది. టీటీడీ ఫుడ్ సేఫ్టీ అండ్ స్టాండర్డ్ అథారిటీ ఆఫ్ ఇండియా ఆదేశాలను పాటించడంతో లడ్డూ ప్రసాదానికి లైసెన్స్‌ మంజూరైంది.