ఉగాది.. మానవుల ఆయుష్షుకు తొలి రోజు!

‘చైత్రమాసి జగద్బ్రహ్మ సపర్ణ పథమే అహని, వత్సరాదౌ వసంతాదౌ రసరాద్యే తథైవచ’ అంటే బ్రహ్మకల్పం ప్రారంభమైన మొదటి ఉగాది ప్రభవ. మొదటి రుతువు వసంతం. తొలి నెల చైత్రం... తిథి పాడ్యమి... ఆదివారం. అంటే ఆసమయంలో ఈ సృష్టి ప్రారంభమైందని లేదా ప్రభవించిందని అర్థం. అందుకే తెలుగు సంవత్సరాలలో మొదటిది ప్రభవ. ప్రభవ అంటే పుట్టుక, తెలివికి మొదటి చోటు.. చివరిది క్షయ. క్షయ అంటే నాశనమయ్యేది. ఈ బ్రహ్మకల్పం అంతమయ్యే ఏడాది అన్నమాట. కాబట్టి చైత్రమాసం శుక్లపక్షంలో సూర్యోదయం కాలంలో పాడ్యమి తిథి ఉన్నరోజునే ఉగాదిగా నిర్ణయించారు.

ఉగస్య ఆదిః ఉగాదిః అంటారు. ఉగ అంటే నక్షత్ర గమనం. అంటే నక్షత్ర గమనం ప్రారంభమే ఉగాది అని అర్థం. మానవుల లెక్క ప్రకారం 432,00,00,000 సంవత్సరాలు బ్రహ్మకు ఒక పగలు. రాత్రికూడా అంతే. అంటే 864,00,00,000 సంవత్సరాలు బ్రహ్మకు ఒక రోజున్నమాట. ఇలాంటివి 360 రోజులైతే ఆయనకు ఒక ఏడాది పూర్తయినట్లు లెక్క. అంటే బ్రహ్మ వందేళ్ల ఆయుష్షు మూడు లక్షల పదకొండు వేల నలభై కోట్ల సంవత్సరాలు.

ఇప్పటివరకు ఆరుగురు బ్రహ్మలు సృష్టికార్యాలను ముగించారు. ప్రస్తుతం ఏడో బ్రహ్మ ద్వితీయపరార్థంలో ఉన్నాడు. అంటే ఆయన వయసు ప్రస్తుతం 51 ఏళ్లు. ప్రస్తుత కలియుగం ప్రమాది నామ సంవత్సరం చైత్ర శుద్ధ పాడ్యమినాడు ప్రారంభమైంది. ఈ కల్పం ప్రారంభమై 197,29,49,114 ఏళ్లు పూర్తయింది. ఇప్పుడు మనం వైవస్వత మన్వంతరంలోని కలియుగంలో ఉన్నాం. ఇది ప్రారంభమై 5114 సంవత్సరాలైంది. ఉగాది రోజునే బ్రహ్మ సృష్టిని మొదలుపెట్టాడని అంటారు. శ్రీమహావిష్ణువు మత్స్యావతారంలో వేదాలను దొంగతనం చేసిన సోమకుడిని సంహరించి వాటిని బ్రహ్మకు అప్పగించిన రోజుకూడా ఇదేనని ప్రతీతి. శ్రీరాముడు, విక్రమాదిత్యుడు, శాలివాహన చక్రవర్తి పట్టాభిషిక్తుడైన రోజుకూడా ఉగాదే. వరాహమిహిరుడు పంచాగాన్ని జాతికి అంకితం చేసింది కూడా ఈ రోజే.

ఉగస్య ఆది: ఉగాది: - "ఉగ" అంటే నక్షత్ర గమనం లేదా జన్మ - ఆయుష్షు అని అర్థాలు కూడా ఉన్నాయి. వీటికి ఆది ఉగాది. అంటే ప్రపంచంలోని జనుల ఆయుష్షుకు మొదటిరోజు కాబట్టి ఉగాదిగా మారింది. యుగం అంటే రెండు లేక జత అని కూడా అర్థం. ఉత్తరాయణ, దక్షిణాయనాలకు ఆయన ద్వయ సంయుతం 'యుగం' (సంవత్సరం) కాబట్టి ఆ యుగానికి ఆది యుగాది అయ్యింది.

ఉగాది - వసంతానికి గల అవినాభావ సంబంధాన్ని సూర్యుడికి సకల రుతువులకు, ప్రాతః సాయం కాలాది త్రికాలానికి ఉషా మాతృస్వరూపం అని విశదీకరించారు. 'వసంతే కపిల స్సూర్యో గ్రీష్మే కాంచన సుప్రభః, శ్వేతో వర్షా సువర్ణేన పాండుశ్శధి భాస్కరః, హేమంతే తామ్ర వర్ణస్తు శిశిరే లోహితో రవిః, ఇతి వర్ణా సమాఖ్యా తాసూర్యసనతు సముద్భవా! అంటే విష్ణు కిరణ ప్రభావితమైన వసంతం పసుపు లేదా గోధుమ రంగులో ఉంటుంది. ఈ కిరణాలు ఉత్తరాయణంలో వికాసం చెంది గ్రీష్మానికి హేతువైన కాంతులు దక్షిణాయనంలో క్షీణిస్తాయని అర్థం.