లక్ష్మీ అనుగ్రహం కోసం శుక్రవారం ఇలా చేస్తే....

పాలు కాచేటప్పుడు పొంగిపోయి బయటకు వస్తున్నాయా ? అయితే అలా వృధా చేయడం మంచిది కాదంటున్నారు. పాలు పొంగి బయటకు రావడమే కాదు చెడిపోయినా ఆ ఇంటికి లక్ష్మీదేవి అనుగ్రహం ఉండదట. పాలను కాచే పాత్రలు పరిశుభ్రంగా ఉంచడంతోపాటు చెడిపోకుండా చూసుకోవాలట.శుక్రవారం నాడు ఉప్పు తీసుకొస్తే అదృష్టం ఇంటిని వెతుక్కుంటూ రావడమే కాదు సకల ఐశ్వర్యాలు చేకూరుతాయట. కానీ శుక్రవారం అప్పు ఇవ్వడం, బియ్యాన్ని వేయించడం, శుభ్రం చేయడం లాంటివి చేయరాదు.

స్త్రీలు మంగళ, శుక్రవారాల్లో తల స్నానం చేయాలి. ఇంటికి వచ్చే ముత్తైదువులకు తాంబూలం ఇవ్వడం అలవాటు చేసుకోవాలి. తాంబూలంలో తమలపాకు, పోకచెక్క, పసుపు, కుంకుమ, పువ్వులు, పళ్లు వీలైతే రవికెను ఇవ్వండి. వీటితోపాటు దక్షిణ కూడా ఇస్తే లక్ష్మీదేవి అనుగ్రహం లభిస్తుంది. సూర్యోదయానికి ముందే మహిళలు నిద్రలేవాలి. నిద్రలేచిన తర్వాత ఇంటి ప్రధాన ద్వారం తెరిచేటప్పుడు లక్ష్మీదేవిని ఆహ్వానించాలి. ఉదయం 4.30 - 6.00 మధ్యలో ఇంటి ముందు శుభ్రం చేసి రంగవల్లికలతో అలంకరించాలి. దీని వల్ల మహాలక్ష్మీ కటాక్షం లభిస్తుంది. సూర్యోదయానికి ముందే ఇంట్లో దీపాన్ని వెలిగించాలి.

సాయంత్రం ఆరు తర్వాత తలదువ్వడం కూడదు. రాత్రి వేళలో పాలు, పెరుగు, కూరగాయలు అప్పు ఇవ్వడం, తీసుకోవడం చేయరాదు. పెళ్లైన మహిళలు నుదుట ఎప్పుడూ కుంకుమ ఉండాలి. ఇంటికొచ్చే ముత్తైదువులకు తాంబూలం ఇచ్చేటప్పడు నుదుట కుంకుమ దిద్దుకుని తర్వాత వారికి ఇవ్వాలని పండితులు సూచిస్తున్నారు.