ధనలక్ష్మీ కొలువుండాలంటే ఇలా చేయాలట!!

మార్కెట్‌‌లో కూరగాయలకు, షాపింగ్‌లకు వెళ్లి ఏమైనా కొనుగోలు చేసిన తర్వాత మిగితా చిల్లరను జేబులో వేసుకుని ఇంటికి చేరుకుంటారు. రాగానే సామాన్లను హాల్లో పడేసి జేబులోని చిల్లర తీసి ఎక్కడో ఓ చోట పడేస్తుంటారు. ఇక ఆడవాళ్ల గురించి చెప్పాల్సి వస్తే వీటిని తీసుకుళ్లి నేరుగా పోపు డబ్బాల్లో దాచేస్తారు. అదీ కాదంటే కూరగాయలు భద్రపరిచే బాస్కెట్ అడుగు భాగంలో పడేస్తారు.

ఎప్పుడైనా డబ్బులు అవసరమైతే పోపు డబ్బాలు, కూరగాయల బాస్కెట్లలో కెలికి వాటిని వాడుకుంటారు. అయితే ఇలాంటి నిర్వాకాలు అసలు చేయకూడదట. ఎందుకంటే డబ్బులను ఎక్కడ పడితే అక్కడ పడిస్తే లక్ష్మీదేవికి ఆగ్రహం వస్తుందట. ఓ పద్ధతంటూ లేకుండా డబ్బులను ఎక్కడక్కడ వదిలేస్తే లక్ష్మీ ఇంట్లోంచి మెల్లగా జారుకుంటుందట. కాబట్టి ప్రత్యేకించి కొన్ని దిక్కుల్లో మాత్రమే నగదు భద్రం చేసుకోవాలట. అప్పుడే ధనలక్ష్మి ఇంట్లో కొలువుంటుందట.

తూర్పు దిక్కులో డబ్బు, లాకర్లు, పశ్చిమ వైపు నగలు పెట్టుకోవాలట. ఉత్తర దిశలో నగలు, డబ్బు కలిపి పెట్టుకోవాలట. నగదును ఎప్పుడూ దక్షిణం వైపు పెట్టకూడదట. అలాగే బాత్రూమ్ ఎదురుగాను డబ్బు భద్రపరిచే లాకర్లు పెట్టరాదట. అంతే కాకుండా లాకర్‌లో దుమ్ము ధూళిని శుభ్రం చేసుకోవాలట. బీరువాల్లో కొందరు లక్ష్మీదేవి ప్రతిమలు, బొమ్మలు ఉంచుతారు. అలాంటి వాళ్లు మాత్రం లక్ష్మీ పక్కన రెండు ఏనుగులు ఉండే రూపాలను మాత్రమే పెట్టుకోవాలి.

ఇంట్లో లక్ష్మీదేవి వెండి విగ్రహాలను, శ్రీ యంత్రాలను ఉంచుకుంటే సంపదకు కొలువే ఉండదట. లివింగ్ రూమ్‌లో వాటర్ ఫౌంటెయిన్‌ను ఆగ్నేయ దిశలో పెట్టుకోవాలట. దాని పక్కనే ఆక్వేరియాన్ని ఏర్పాటు చేసుకుని డ్రాగన్ ఫిష్ పెంచుకుంటే సిరిసంపదలు వెల్లువిరుస్తాయట.