అష్టైశ్వర్యాలను ప్రసాదించే వరలక్ష్మీ వ్రతం

హిందూ సంప్రదాయంలో శ్రావణానికి ఓ ప్రత్యేకత ఉంది. ఈ మాసంల వివాహాలు, శుభకార్యాలు, పండుగలకు అనుకూలంగా ఉంటుంది. శ్రావణ శుక్లపక్షంలో పౌర్ణమికి ముందు వచ్చే శుక్రవారాన్ని వరలక్ష్మీ వ్రతంగా జరుపుకోవడం సంప్రదాయం. శ్రీమహావిష్ణువు దేవేరి లక్ష్మీని వరలక్ష్మీగా ఆరాధిస్తారు. ఈ వ్రతాన్ని వివాహిత మహిళలు నిర్వహిస్తారు. ఈ రోజున లక్ష్మీదేవిని పూజిస్తే అష్టలక్ష్మీలను పూజించిన ఫలితం. ముఖ్యంగా భర్త ఆరోగ్యం, అష్టైశ్వర్యాలు కలగాలని మహిళలు పూజిస్తారు. స్కంద పురాణంలో పరమేశ్వరుడు వరలక్ష్మీ వ్రతం గురించి పార్వతీదేవికి వివరించినట్లు ఉంది.

స్త్రీలు సకల ఐశ్వర్యాలనూ పొందే ఏదైనా ఓ వ్రతం గురించి తెలపమని పార్వతీదేవి కోరితే శివుడు వరలక్ష్మీ వ్రత మహాత్మ్యాన్ని వివరించాడు. అలాగే చారుమతీదేవి వృత్తాంతాన్ని కూడా తెలియజేశాడు. భర్త పట్ల ఆదరణ, అత్తమామల పట్ల గౌరవం కలిగిన చారుమతి ఉత్తమ ఇల్లాలుగా తన బాధ్యతల్ని నిర్వహిస్తూ ఉండేది. లక్ష్మీదేవి పట్ల భక్తిశ్రద్ధలు కలిగిన చారుమతి, త్రికరణ శుద్ధిగా ఆమెను పూజిస్తుండేది. ఆమె పట్ల వరలక్ష్మీకి అనుగ్రహం కలిగి, స్వప్నంలో సాక్షాత్కరించింది. శ్రావణ శుక్ల పూర్ణిమకు ముందు వచ్చే శుక్రవారం తనను ఆరాధిస్తే కోరిన వరాలన్నీ ఇస్తానని అభయమిచ్చింది. తన స్వప్న వృత్తాంతాన్ని భర్తకు చారుమతి తెలియజేస్తే అతడు మిక్కిలి సంతోషించి ప్రోత్సహించాడు. శ్రావణ శుక్రవారం రోజున చారుమతి తొమ్మిది రంగుల తోరణం కుడిచేతికి కట్టుకొని, యధాశక్తిని లక్ష్మీదేవికి నైవేద్యం సమర్పించి, ప్రదక్షిణ చేసింది.

ఆమెతోపాటు మిగతా ముత్తైదువులు కూడా ప్రదక్షిణం చేయగా ఘల్లు ఘల్లు మని ధ్వని వినిపించడంతో కిందకి చూడగా వారి కాళ్లకు గజ్జెలు, అందెలు మున్నగు ఆభరణాలు కనిపించాయి. కానీ భక్తితో రెండోసారి ప్రదక్షిణం చేయగా వారి చేతులకు నవరత్నఖచిత కంకణాలు, మూడో ప్రదక్షిణం చేసిన వెంటనే వారి ఇంటిలో సకల సంపదలు ఒసగెను. నాటి నుంచి స్త్రీలందరూ ఆ వ్రతాన్ని ఏటా ఆచరించి, సిరి సంపదల్ని అందుకుందన్నారి మహాదేవుడు తెలిపాడు. పార్వతీ దేవి కూడా ఈ వ్రతాన్ని ఆచరించి, వరలక్ష్మి కృపకు పాత్రురాలైందని చెబుతారు.

అష్టలక్ష్ముల్లో వరలక్ష్మీకి ఓ ప్రత్యేకత ఉంది. మిగతా పూజలకంటే వరలక్ష్మీ పూజించడం చాలా శ్రేష్ఠం. శ్రీహరికి ఇష్టమైన, ఆయన జన్మనక్షత్రమైన శ్రవణం పేరిట వచ్చే శ్రావణమాసంలో ఈ వ్రతాన్ని చేస్తే విశేష ఫలితాలు లభిస్తాయి. సర్వమంగళ సంప్రాప్తి, సకలాభీష్టం, నిత్య సుమంగళిగా వర్ధిల్లాలని స్త్రీలు ఈ వ్రతం చేస్తారు. దక్షిణ భారతదేశంలో ఈ వరలక్ష్మీ వ్రతాన్ని వివిధ సంప్రదాయాల్లో ఆచరిస్తారు. పద్ధతులు వేరైనా శ్రీ లక్ష్మిని కొలిచే తీరు మాత్రం ఒక్కటే.