జాతకంలో కాలసర్ప దోషం ఉంటే లాభమే?

భారతీయులు ముఖ్యంగా హిందువులకు భక్తి విశ్వాసాలతో పాటు మూఢ విశ్వాసాలు ఎక్కువే. వాటిలో జ్యోతిషం కూడా ఒకటి. కేవలం దిన, వార, మాస ఫలాల్లోనే వివాహ సమయాల్లోనూ జాతకాలకు అత్యంత ప్రాధాన్యత ఇస్తారు. జన్మ నక్షత్రాలకు, రాశులకు తగిన వధువు లేదా వరుడిని నిర్ణయించి ముహుర్తాలు ఖరారు చేస్తారు. అయితే కొంతమంది రాశి చక్రంలో కాలసర్ప దోషం ఉంటే భయంతో వణికిపోతారు. దీని వల్ల తమకు చెడు జరుగుతుందని గుడ్డిగా నమ్మి పూజలు, శాంతి హోమాలు జరిపిస్తుంటారు. కానీ ఈ దోషం వల్ల కేవలం చెడు మాత్రమే అపుడప్పుడూ మంచి కూడా జరుగుతుంది.

నవగ్రహ కూటమిలోని రాహు, కేతువులే కాకుండా మిగతా గ్రహాలన్నీ ఆ రెండింటి చట్రంలో ఇరుక్కుపోతే కాలసర్ప దోషం సంభవిస్తుంది. ఆ సమయంలో జన్మించిన వారికే మాత్రమే దోషం ఉంటుంది. ఈ దోషంతో అశుభమే జరుగుతుందని భావించడం పొరపాటు. కొన్నిసార్లు మంచి దోషాలు కూడా ఉంటాయి.

ఈ కాలసర్ప దోషంలో జన్మించిన వారిలో జవహర్‌లాల్ నెహ్రూ, ధీరుభాయ్ అంబానీ, సచిన్ టెండూల్కర్ లాంటి గొప్ప వ్యక్తులు కూడా ఉన్నారు. వీళ్లు తమకు ఇష్టమైన రంగాల్లో అద్భుతంగా రాణించి, కేవలం వ్యక్తిగతంగానే కాకుండా దేశానికి కూడా కీర్తి ప్రతిష్టలు తీసుకొచ్చారు. కాలసర్ప దోషంలో జన్మించినా శ్రమను నమ్ముకున్న వారిపై ఈ దోషం ఎలాంటి ప్రభావం చూపదని పండితులు పేర్కొంటున్నారు.

కాలసర్ప దోషం ఉన్నవారికి గ్రహాలు అనుకూలిస్తే ఆర్థికంగానే కాకుండా అన్ని రంగాల్లోనూ అద్భుతంగా ఉంటుంది. ఈ దోషం ఉన్నవారి జాతక చక్రంలో బృహస్పతి (గురు గ్రహం) ఉచ్ఛ స్థానంలో ఉన్నా లేదా రాహువుతో కలిసి ఉన్నా దశ మారి మహోజ్వలంగా ఉంటుంది. ఇలాంటి వ్యక్తులు అత్యుత్తమ ప్రతిభావంతులుగా ఖ్యాతి గడిస్తారు.