సహస్ర కవచుడనే రాక్షసుడే కర్ణుడిగా పుట్టి....

దక్షప్రజాపతి కుమార్తె మూర్తికి, ధర్ముడు అనే ప్రజాపతికి నర నారాయణులు జన్మించారు. వీరు పుట్టగానే బదరికాశ్రమానికి వెళ్లి తపస్సు ఆచరించారు. లోక కళ్యాణాన్ని సమకూర్చి అన్ని ఫలాలను అందించేది, పాపాలను పోగొట్టేది తపస్సే అని లోకానికి బోధించారు. అరణ్యంలో నిద్రాహారాలు మాని శరీరాన్ని, మనసును శుష్కింపజేసుకునేది మాత్రమే తపస్సు కాదని, నిత్య జీవితంలో మనం బాగా ఇష్టపడి అనుభవిస్తున్న వాటిని ఏ కొద్దిగా తగ్గించుకున్నా తపస్సే అని లోకానికి బోధించారు.

తపో భంగం కలిగించడానికి ఇంద్రుడు పంపిన రంభ, మేనక, తిలోత్తమ లాంటి అప్సరసల అందం ఏమాత్రమని తమ ఉరువు నుంచి అతిలోక సౌందర్యరాశి ఊర్వశిని సృష్టించి ఇంద్రునికి కానుకగా పంపారు. అపకారం చేసిన వారికి ఉపకారం చేసి, కోరికను గెలిచినవాడు కాదు కోపాన్ని జయించిన వాడే దేవుడని లోకానికి నర నారాయణులు ధర్మసూక్ష్మాన్ని బోధించారు. ఏక కాలంలో ఐదు వందల ఏళ్లు తపస్సు చేసిన వారి చేతిలోనే మరణించేలా సహస్ర కవచుడు అనే రాక్షసుడు ఈశ్వరుడి నుంచి వరం పొందాడు. ఆ వరాన్ని సార్ధకం చేయడానికి స్వామి నరనారాయణులనే రెండు రూపాలను ధరించి నరుడు తపస్సు చేస్తే, నారాయణుడు యుద్ధం చేయగా, నారాయణుడు తపస్సు చేస్తే నరుడు యుద్ధం చేసేవాడు.

ఈ విధంగా నారాయణుడు వెయ్యి కవచాలను తన చక్రంతో చేధిస్తుండగా శంకరుడు తానిచ్చిన వరాన్ని మన్నించమని కోరితే అతడిని మూడు కవచాలతో వదిలాడు. తర్వాత కాలంలో త్వష్ట ప్రజాపతికి పుత్రుడు వృత్రాసురుడిగా జన్మించిన సహస్ర కవచుడు ఇంద్రుని చేతిలో మరణించినప్పుడు ఒక కవచం పోయింది. తర్వాత ఘంటాకర్ణుడను రాక్షసుడిగా జన్మించి శ్రీహరి సహరించినప్పుడు రెండో కవచాన్ని పోగొట్టుకున్నాడు. సహజ కవచకుండలాలతో కర్ణుడిగా పుట్టి అర్జునుడు అనగా నరునితో వధించబడి ముక్తిని పొందాడు సహస్రకవచుడు. నరనారాయణులే ద్వాపర యుగంలో కృష్ణార్జునులుగా జన్మించారు.

సూర్యుడి వరంతో కుంతికి జన్మించిన కర్ణుడి అసలు పేరు వసుసేనుడు. ఈ వసుసేనుడే సహస్ర కవచుడు. జన్మతహ వచ్చిన కవచ కుండలాలను శరీరం నుంచి వేరుచేసి ఇంద్రుడికి దానంగా ఇచ్చాడు. కవచ కుండలాలను దానం చేయబట్టే అతడికి కర్ణుడు అనే పేరు వచ్చింది. నిజానికి దుర్యోధనుని ప్రాపకం పొందేనాటికే అతనికి కవచకుండలాలు లేవు. ఇంద్రుడికి దానమిచ్చేశాడు.