Chandra Grahanam: మూఢనమ్మకాలొద్దు.. గ్రహణ చంద్రుడితో సెల్ఫీ తీసుకోండి

మూఢనమ్మకాలను పక్కనపెట్టి అరుదుగా వచ్చే సంపూర్ణ అరుణ వర్ణ చంద్ర గ్రహణాన్ని ఈరోజు రాత్రి అందరూ ఆస్వాదించాలని ఖగోళ నిపుణులు సూచిస్తున్నారు. ఈ రోజు రాత్రి 11.45 గంటలకి మొదలయ్యే ఈ చంద్ర గ్రహణం ఈ శతాబ్దంలోనే అరుదుగా వచ్చే సంపూర్ణ అరుణ వర్ణ చంద్ర గ్రహణంగా నిలవనుంది. 43 నిమిషాల పాటు ఉండనున్న ఈ గ్రహణానికి తోడు.. అరుణ గ్రహం భూమికి చేరువగా రానుండటంతో ఆకాశంలో కనువిందు చేయనున్న ఈ అద్భుతాన్ని అందరూ ఆస్వాదించాలని నిపుణులు చెప్తున్నారు.

‘గ్రహణం అనగానే కొంతమందిలో అలానే అపోహలు ఉండిపోయాయి. ఆ సమయంలో ఇంటి వెలుపలికి వెళ్లకూడదని.. ఏమీ తినకూడదని చెప్తుంటారు. వాస్తవానికి అలాంటి చెడు ఏమీ జరగదు. చక్కగా ఆకాశంలో కనువిందు చేయనున్న అరుణ వర్ణ చంద్ర గ్రహణాన్ని ఆస్వాదించండి. ఇష్టమైన ఆహారాన్ని తిని.. చక్కగా సెల్ఫీలు తీసుకుని.. ఎక్లిప్స్‌ఈటింగ్ యాష్‌ట్యాగ్‌ పేరుతో సోషల్ మీడియాలో పోస్ట్ చేయండి’ అని పుణెలోని నేషనల్‌ సెంటర్‌ ఫర్‌ రేడియో ఆస్ట్రోఫిజిక్స్‌ పరిశోధకులు నీరుజ్‌ మోహన్‌ రామానుజం సూచించారు.