దేవతలు కూడా శివలింగాన్ని ఎందుకు పూజిస్తారు?

రావణాసురు వధతో బ్రహ్మహత్యా దోషం నుంచి విముక్తి పొందడానికి శ్రీరాముడు శివలింగారాధనకు సిద్ధమయ్యాడు. రామేశ్వరం తీరంలో శివలింగ ప్రతిష్ఠాపన చేయాలనుకున్నాడు. సముద్రానికి ఇవతలి ఒడ్డున ఉన్న పుల్ల గ్రామానికి చెంత, సేతువుకు సమీపంలో గంధమాదన పర్వత పాదం దగ్గర లింగాన్ని ప్రతిష్టించాలన్నది రాముడి సంకల్పం.

ఆంజనేయుడు కైలాసం నుంచి తెచ్చిన విశ్వేశ్వర లింగంతోపాటు తాను పూజించిన సైకత లింగాన్ని కూడా రామేశ్వరంలోనే ప్రతిష్ఠించి ఆయోధ్యకు వెళ్లినట్లు పురాణాలు చెబుతున్నాయి. రాముడు విష్ణుమూర్తి అవతారమైనా శివ లింగాన్ని పూజించి బ్రహ్మహత్యా దోషాన్ని తొలగించుకుంటాడు. అలాగే దేవతలు కూడా పరమ శివుని వేర్వేరు రూపాల్లో పూజిస్తారు.

మనుషులు తమ కష్టాలు తొలగి, కోరికలు నెరవేరాలని దేవుళ్లను పూజిస్తారు. అయితే కోరికలు నెరవేరడం కోసమే కాదు లోక కళ్యాణానికి కూడా దేవుళ్లను పూజించడంలో అంతరార్థం దాగి ఉంది. అందుకే దేవుళ్లయినా సరే పూజలు చేస్తారు. ప్రత్యేకించి శివుడిని కొలుస్తారు. రాముడిలా ఇతర దేవుళ్లు ఏ శివలింగాన్ని పూజిస్తారో తెలుసా.

లక్ష్మీనాధుడైన విష్ణుమూర్తి ఇంద్ర లింగాన్ని, సృష్టికర్త బ్రహ్మ స్వర్ణ లింగాన్ని పూజిస్తారు. విష్ణు వక్షస్థలంలో కొలువున్న లక్ష్మీదేవి నేతితో చేసిన లింగాన్ని, సరస్వతీ స్వర్ణ లింగాన్నే పూజిస్తుందని పురాణాల్లో పేర్కొన్నారు. దేవతాధిపతి అయిన ఇంద్రుడు పద్మరాగ లింగాన్ని, యమలోకాధిపతి యమ ధర్మరాజు గోమేధిక లింగాన్ని, వాయుదేవుడు కాంస్య లింగాన్ని, చంద్రుడు ముత్యపు లింగాన్ని పూజిస్తారు.

అశ్వినీదేవతలు మట్టితో చేసి లింగాలను, నాగులు పగడపు లింగాన్ని అర్పిస్తారు. ఇక సకల సంపదలకు అధిపతి అయిన కుబేరుడు కూడా తనకు తాత అయిన బ్రహ్మలా (బ్రహ్మ మానస పుత్రుడైన పులస్త్యుని కుమారుడు కుబేరుడు) స్వర్ణ లింగాన్ని పూజిస్తాడని ఆధ్యాత్మిక వేత్తలు చెబుతున్నారు.