శ్రీవారి బ్రహ్మోత్సవాలు.. మోహినీ రూపంలో జగన్మోహనుడు

వార్షిక బ్రహ్మోత్సవాల్లో భాగంగా ఐదో రోజైన సోమవారం ఉదయం శ్రీహరి మోహినీ రూపంలో శృంగార రసాధి దేవతగా సర్వాలంకార భూషితుడై భక్తులకు దర్శనమిచ్చాడు. పక్కనే శ్రీకృష్ణుడి రూపంలో అలంకృతుడై మరో తిరుచ్చిపై భక్తులకు అభయమిచ్చాడు. ఏనుగులు, అశ్వాలు ముందు కదులుతుండగా భక్తుల కోలాటాలు, డప్పుల వాయిద్యాలు, ఇతర కళాప్రదర్శనల నడుమ ఊరేగింపు కడు రమణీయంగా సాగింది.

మోహినీ అవతారం ద్వారా జగత్తు అంతా మాయామోహానికి లొంగివుందని, అది తన లీలావిలాసమేనని, భక్తులు కానివారు ఈ జగన్మాయలోలులు కాక తప్పదని స్వామివారు చాటి చెబుతున్నారు. సాయంత్రం 4 నుంచి 5 గంటల వరకు ఊంజల్‌సేవ వైభవంగా జరిగింది. రాత్రి 7 నుంచి 12 గంటల వరకు గరుడవాహనంపై స్వామివారు కటాక్షించనున్నారు.

బ్రహ్మోత్సవాల్లో భాగంగా సోమవారం ఉదయం స్వామివారు దంతపు పల్లికిలో మోహినీ వేషధారణలో భక్తులను అనుగ్రహించారు. ఈ సేవ ముగియగానే, మాడ వీధుల్లోని గ్యాలరీల్లోకి ఉదయం 11 గంటల నుంచి గరుడోత్సవానికి భక్తులను అనుమతించారు. స్వర్ణ గరుడ వాహనంపై విశేష ఆభరణాలతో అలంకృతుడైన స్వామి, గజమాలలు, శ్రీవిల్లి పుత్తూరులో గోదాదేవికి అలంకరించిన మాలలను శ్రీవారు ధరించి భక్తులకు కనువిందు చేయనున్నారు. గర్భాలయంలో మూలవర్లకు ఎల్లప్పుడూ సమర్పణలో ఉండే చతుర్భుజ లక్ష్మీహారం, ఐదు పేటల సహస్రనామం, మకరకంఠి ఉండే ప్రాచీన మూడుపేటల తిరువాభరణాలతో స్వామికి అలంకరిస్తారు.