శ్రీవారి గరుడసేవ.. భక్తజనసంద్రమైన తిరుమల

నవరాత్రి బ్రహ్మోత్సవాల్లో భాగంగా తిరుమల శ్రీవారికి ఐదో రోజు ఆదివారం రాత్రి గరుడోత్సవం వైభవంగా సాగింది. ఈ ఉత్సవాన్ని తిలకించేందుకు లక్షలాదిగా తరలివచ్చిన భక్తులతో సప్తగిరులు జనసంద్రాన్ని తలపించాయి. అర్ధరాత్రి వరకు తిరువీధుల్లో తనకు అత్యంతప్రీతిపాత్రుడైన గరుత్మండిపై జనసంద్రం మధ్య శ్రీనివాసుడు ఊరేగుతూ అభయహస్తం ప్రసాదించాడు. గరుడ వాహనాన్ని అధిరోహించిన శ్రీవారి దర్శనాన్ని భక్తకోటికి కల్పించారు. గతం కంటే గరుడోత్సవం అత్యంత కమనీయంగా జరిగింది. మాడవీధుల వెంట ఇరువైపులా ఉన్న భక్తుల వద్దకు వాహనాన్ని మళ్లించి నెమ్మదిగా ముందుకు సాగుతూ శ్రీవారిని చూపించారు. మూలవిరాట్టుకు అలంకరించే మకరకంఠి, లక్ష్మీహారం, సహస్రనామమాల వంటి విశేష తిరువాభరణాలను ఉత్సవమూర్తికి అలంకరించడం గరుడసేవ ప్రత్యేకత. ఈ తిరువాభరణాలతో మలయప్పస్వామి దేదీప్యమానంగా వెలుగొందారు.

అలాగే విల్లుపుత్తూరులోని అమ్మవారికి అలంకరించి మాలలు, చైన్నై నుంచి తీసుకొచ్చిన గొడుగులు గరుడవాహన సేవలో ప్రత్యేకంగా నిలిచాయి. ఇక గ్యాలరీల్లో ఉన్న భక్తులకు ఉదయం నుంచి రాత్రి వరకు అన్నపానీయాలు అందించారు. మజ్జిగ, పాలు, పులిహోర, మంచినీటి సరఫరాకు ఎలాంటి ఇబ్బందులు తలెత్తకుండా ముందు జాగ్రత్తలు తీసుకున్నారు. తిరుమలకు భక్తుల రాక ఓ ప్రవాహాన్ని తలపించింది. వాహనాలు, రెండు కాలినడక మార్గాల్లో లక్షలాదిగా భక్తులు తిరుమలకు చేరుకున్నారు. ఉదయం మోహినీ అవతారంలో స్వామివారు ఊరేగుతున్న సమయానికే గ్యాలరీలు దాదాపు నిండిపోయాయి. మధ్యాహ్నానికే దాదాపు 2 లక్షల మంది భక్తులు గ్యాలరీల్లోకి చేరారు. ఆ తర్వాత వచ్చిన యాత్రికులు తిరువీధుల బయటే ఉండిపోయారు.

దాదాపు లక్ష మందికిపైగా భక్తులు గరుడసేవను వీక్షించలేని పరిస్థితి నెలకొంది. శ్రీవారి గరుడవాహన సేవను తిలకించేందుకు వరుణుడు కూడా తరలివచ్చాడా అన్నట్టు ఆదివారం రాత్రి వర్షం కురిసింది. సాయంత్రం 7 గంటలకు గరుడ వాహనసేవ ప్రారంభానికి ముందే 6.40 గంటలకు వర్షం మొదలైంది. జోరున కురిసిన వర్షంలోనూ భక్తులు కదలకుండా వేచి ఉన్నారు. దాదాపు గంట పాటు జల్లులు పడుతూనే ఉన్నాయి. అయితా చలించలేదు.