Kanyaka Parameswari: కన్యకాపరమేశ్వరికి ఆరు కిలోల పసిడి చీర

ఆర్యవైశ్యుల కులదైవం వాసవీ కన్యకాపరమేశ్వరి అమ్మవారి పుట్టినరోజు వేడుకలు తెలుగు రాష్ట్రాల్లో బుధవారం నాడు ఘనంగా నిర్వహించారు. ప్రత్యేక పూజలు, అమ్మవారి ఊరేగింపులు ఎంతో వైభవంగా జరిగాయి. ఈ సందర్భంగా ప్రకాశం జిల్లా మార్కాపురం ఆర్యవైశ్య సంఘం ఆరు కిలోల బంగారంతో తయారు చేయించిన చీరను వాసవీ కన్యకాపరమేశ్వరికి సమర్పించింది. వాసవీ మాత జన్మదిన ఉత్సవాల్లో భాగంగా నిర్వహించిన కార్యక్రమంలో మంత్రి శిద్దా రాఘవరావు, రాజ్యసభ సభ్యులు టీజీ వెంకటేష్‌‌లు పాల్గొన్నారు. వారి చేతుల మీదుగా ఈ పసిడి చీరను అమ్మవారికి అందజేశారు. భక్తులు, దాతల సహకారంతో రూ.2 కోట్లు వెచ్చించి ఈ చీరను రూపొందించారు. నూతన గజవాహనంతో కన్యకాపరమేశ్వరికి నగరోత్సవం నిర్వహించారు. ప్రత్యేక పూజలు అనంతరం అమ్మవారికి బంగారు చీరను అలంకరించారు. 108 మంది మహిళలతో దేవీ ఖడ్గమాల మంత్రాలతో అమ్మవారికి కుంకుమపూజ నిర్వహించారు.

కన్యకాపరమేశ్వరికి ఇంతటి విలువైన చీరను సమర్పించడం తెలుగు రాష్ట్రాల్లో ఇదే తొలిసారి కావడం విశేషం. గతేడాది దసరా ఉత్సవాల్లో దుర్గామాత కోసం దాదాపు పశ్చిమ్ బెంగాల్‌కు చెందిన ఓ ఉత్సవ కమిటీ 22 కిలోల బంగారంతో చీరను తయారు చేయించిన విషయం తెలిసిందే. శ్రీకాళహస్తిలోని జ్ఞానప్రసూనాంబకు కర్ణాటకకు చెందిన బీజేపీ నేత గాలి జనార్ధన్ రెడ్డి గతంలో ఓ బంగారు చీరను సమర్పించాడు.