శ్రీవారి సేవలో రాష్ట్రపతి.. కోవింద్‌ను ఆకర్షించిన ముడుచుకునే పైకప్పు!

శనివారం సాయంత్రం తిరుమలకు చేరుకున్న రాష్ట్రపతి రామ్‌నాథ్ కోవింద్ ఆదివారం ఉదయం శ్రీవారిని దర్శించుకున్నారు. ఆదివారం ఉదయం 5.30 గంటలకు తిరుమలలోని శ్రీపద్మావతి విశ్రాంతి భవనం నుంచి బయలు దేరి క్షేత్ర సంప్రదాయాన్ని పాటిస్తూ శ్రీవారి పుష్కరిణిలో ప్రోక్షణం చేసుకున్నారు. అనంతరం శ్రీ భూ వరహస్వామివారిని ద‌ర్శించుకున్నారు. అక్కడి నుంచి శ్రీవారి ఆలయానికి చేరుకున్న రాష్ట్రపతికి టీటీడీ ఛైర్మ‌న్ వైవీ సుబ్బారెడ్డి, ఈవో శ్రీ అనిల్‌కుమార్ సింఘాల్, ప్ర‌త్యేకాధికారి ధ‌ర్మారెడ్డి సాదరంగా అహ్వానించారు. అర్చక బృందం ‘ఇస్తికఫాల్‌’ ఆలయ మర్యాదలతో ఆగమోక్తంగా స్వాగతం పలికింది.

ధ్వజస్తంభానికి నమస్కరించిన అనంతరం కుటుంబ సమేతంగా ఆనంద నిలయంలో శ్రీవారి మూల విరాట్‌ను దర్శించుకున్నారు. సబేరాలో అర్చకులు, అధికారులు రాష్ట్రపతిని స్వామివారి శేషవస్త్రంతో సత్కరించారు. రంగనాయకుల మండపంలో రాష్ట్రపతి దంపతులకు పండితులు వేదాశీర్వచనం చేశారు. టీటీడీ ఛైర్మన్‌, ఈవోలు రాష్ట్రపతి దంపతులకు స్వామివారి చిత్రపటం, తీర్థ ప్రసాదాలను అందజేశారు. రాష్ట్రపతి పర్యటనలో గవర్నర్‌ నరసింహన్‌, డిప్యూటీ సీఎం నారాయణ స్వామి, ఢిల్లీ ఏపీ ప్రభుత్వ ప్రత్యేక ప్రతినిధి విజయసాయి రెడ్డి తదితరులు పాల్గొన్నారు.

అయితే, శ్రీవారి ఆలయంలో పడికావిలి నుంచి ధ్వజస్తంభం మధ్య ఏర్పాటుచేసిన ముడుచుకునే పైకప్పు రాష్ట్రపతిని ఆకర్షించింది. దీని పనితీరును రాష్ట్రపతి పరిశీలించారు. ఎండ, వర్షాలకు భక్తులు ఇబ్బంది పడకుండా పైకప్పును ఏర్పాటు చేసినట్లు టీటీడీ ఈవో వివరించారు. శ్రీవారి ఆలయం నుంచి బయటకు వచ్చిన తర్వాత కోవింద్ కాసేపు విశ్రాంతి తీసుకున్నారు. అనంతరం తిరుపతికి బయలుదేరి వెళ్లి, అక్కడ శ్రీపద్మావతి విశ్రాంతి భవనాన్ని ప్రారంభిస్తారు. తర్వాత మధ్యాహ్నం తిరుపతి విమానాశ్రయం నుంచి హెలికాఫ్టర్‌లో శ్రీహరికోటలో షార్ కేంద్రానికి వెళ్లనున్నారు. సోమవారం తెల్లవారుజామున చంద్రయాన్‌-2 ఉపగ్రహ ప్రయోగాన్ని వీక్షిస్తారు. అనంతరం తిరిగి తిరుపతి విమానాశ్రయానికి చేరుకుని..ఢిల్లీకి ప్రయాణమవుతారు.