టీటీడీపై రమణ దీక్షితులు సంచలన వ్యాఖ్యలు!

అర్చకులకు 65 ఏళ్ల నిబంధనను తిరుమల తిరుపతి దేవస్థానం అమల్లోకి తీసుకురావడంతో శ్రీవారి ప్రధాన అర్చకుడు రమణ దీక్షితులు ఆ పదవి నుంచి తొలగించబడ్డారు. దీంతో టీటీడీ అకస్మాత్తుగా తీసుకొచ్చిన ఈ నిర్ణయంపై ఆయన మండిపడ్డారు. అంతేకాదు పాలకమండలిపై తీవ్ర ఆరోపణలు గుప్పించారు. శ్రీవారి మహిమల గురించి భక్తులకు చెప్పే తాను, టీటీడీ పాలక మండలి అరాచకాల గురించి చెప్పాల్సి రావడం దురదృష్టకరమని రమణ దీక్షితులు వ్యాఖ్యానించారు. సాధారణ ప్రభుత్వ ఉద్యోగుల మాదిరిగా దేవాదాయ శాఖ కింద ఉన్న అర్చకులకు పదోన్నతలు, ఇంక్రిమెంట్లు, పీఎఫ్, గ్రాట్యుటీ తదితర సౌకర్యాలు లేవని, వేలాది మంది అర్చకులు 80 ఏళ్ల వయసులోనూ విధులు నిర్వహిస్తున్నారని గుర్తు చేశారు. అసలు అర్చకులకు పదవీ విరమణ నిబంధన పెట్టాలన్న ఆలోచనే దుర్మార్గమైన చర్యగా ఆయన అభివర్ణించారు.

స్వామివారి కైంకర్యాలను త్వరగా ముగించాలని తమపై ఒత్తిడి తెచ్చారని, అవమానకరంగా మాట్లాడారని దీక్షితులు ఆరోపించారు. స్వామివారికి సమయానికి నైవేద్యం కూడా పెట్టనిచ్చేవారు కాదని, ఇన్ని రోజులూ ఓర్పుతో ఉన్నామని అన్నారు. టీటీడీ వేధింపులు, అవమానాలను భరించలేకనే మీడియా ముందుకు రావాల్సి వచ్చిందని ఆయన వివరణ ఇచ్చారు. స్వామిని భక్తులే కాపాడుకోవాలని తాను విజ్ఞప్తి చేయడం వల్లే, తనపై కక్షసాధింపు చర్యలకు పాల్పడ్డారని పేర్కొన్నారు. అందుకే 65 ఏళ్ల నిబంధనను అకస్మాత్తుగా తెరపైకి తెచ్చి తనతోపాటు మరో ముగ్గురు సీనియర్ అర్చకులను పదవీ విరమణ చేయించారని ఆయన ఆరోపించారు. తమకు జరుగుతున్న అన్యాయంపై న్యాయ పోరాటం చేస్తామని రమణ దీక్షితులు స్పష్టం చేశారు.

మరోవైపు రమణ దీక్షితులు వ్యాఖ్యలపై దేవాదాయ మంత్రి కేఈ కృష్ణమూర్తి ఆగ్రహం వ్యక్తం చేశారు. ఆయన బాధ్యతారాహిత్యంగా మాట్లాడుతున్నారని, భక్తుల మనోభావాలు దెబ్బతీసేలా వ్యవహరిస్తున్న, ఆయనపై చర్యలు తీసుకుంటామని హెచ్చరించారు. ఆయన వ్యవహారశైలి అర్చక వృత్తి నుంచి రాజకీయ దీక్ష తీసుకున్నట్టుగా ఉందని, గతంలో చేసిన తప్పులకు చర్యలు తప్పవని ఉద్ఘాటించారు.