లక్ష్మణుడు పద్నాలుగేళ్లు నిద్రలేకుండా....

గతంలో కైకేయికి ఇచ్చి వరం వల్ల తండ్రి మాటకు కట్టుబడిన రాముడు అడవులకు పయనమయ్యాడు. రాముడి వెంట సీతాదేవి కూడా అరణ్యాలకు బయలుదేరింది. తాను ఎంతగానే ఆరాధించే రాముడు అరణ్య వాసానికి బయలుదేరడంతో అన్న సంరక్షణ కోసం లక్ష్మణుడు కూడా అనుసరించాడు. లక్ష్మణుడి భార్య ఊర్మిళాదేవి నేను కూడా వస్తానని చెప్పింది. దీనికి సౌమిత్రి వద్దని వారించాడు. నేను అన్నా వదిల సంరక్షణ కోసం వెళుతున్నాను... నీవు వెంట వస్తే నా విధులను సమర్థవంతంగా నిర్వహించలేను.... నిన్ను విడిచి ఉండలేను కానీ వెళ్లక తప్పదు... రావడం మంచిది కాదని లక్ష్మణుడు తెలిపాడు. భర్త అభిమతాన్ని, అంతరంగాన్ని గుర్తించిన ఊర్మిళ అయోధ్యలోనే ఉండిపోయింది.

సీతారాములను సేవించే భాగ్యం తనకు దక్కలేదని, భర్త ఆశయంలో భాగస్వామి కాలేకపోయానని చింతించింది. అడవిలో సీతారాములు నిద్రపోయే సమయంలో లక్ష్మణుడు విల్లు చేతబూని వారికి రక్షణగా కుటీరం బయట నిలబడితే నిద్ర దేవత సమీపించింది. అప్పుడు లక్ష్మణుడు తల్లీ నా కర్తవ్యానికి ఆటంకం కలిగించకు....మాత‌పితృ సమానులైన అన్నావదినల సేవ కోసం వచ్చాను... ఈ పద్నాలుగేళ్లు నన్ను విడిచిపెట్టు అని నిద్రాదేవిని ప్రార్థించాడు. సౌమిత్రి భాతృ భక్తికి సంతోషించిన దేవత అందుకు అంగీకరించింది. అయితే ప్రకృతి ధర్మాన్ని తప్పరాదని, నీ నిద్రను ఎవరికైనా పంచాలని పలికింది. వెంటనే లక్ష్మణుడు మాతా ఈ పద్నాలుగేళ్ల నిద్రను నా భార్య ఊర్మిళకు ప్రసాదించు... ఆమెకు నా అభిప్రాయం తెలియజేయు, తప్పక అంగీకరిస్తుంది అన్నాడు. భర్త కోరిక ప్రకారం ఊర్మిళాదేవి సంతోషంగా తనవంతు సాయం అందించింది.

అయితే లక్ష్మణుడి మెళకువకు ఇంకో కారణం కూడా ఉంది. రావణాసురుని కుమారుడు మేఘనాథుడు పద్నాలుగేళ్లు నిద్రపోని వీరునితో మరణించేలా వరం పొందాడు. లక్ష్మణుడి నిద్రను ఊర్మిళ స్వీకరించడంతో మేఘనాథుని సంహరించే అవకాశం దక్కింది. భర్త వెంట అడవులకు రాకపోయినా ధర్మపత్నిగా తన విద్యుక్తధర్మాన్ని నిర్వహించింది.