శబరిమల ఆలయం కేసు.. రాజ్యాంగ ధర్మాసనానికి!

ప్రతిష్ఠాత్మక శబరిమల అయ్యప్ప దేవాలయంలోకి అన్ని వయసుల మహిళలను అనుమతించాలని కోరుతో సుప్రీంకోర్టులో పిటిషన్ దాఖలైన విషయం తెలిసిందే. ఈ వ్యాజ్యంపై విచారణ జరిపిన సుప్రీంకోర్టు, తీర్పును వెలువరించలేకున్నామని, కేసును రాజ్యాంగ ధర్మాసనానికి బదిలీ చేస్తున్నామని పేర్కొంది. ఐదుగురు సభ్యుల రాజ్యాంగ ధర్మాసనం కేసును విచారించి తీర్పు వెల్లడిస్తుందని, కోట్లాది మంది భక్తుల మనోభావాలను దృష్టిలో ఉంచుకుని ఈ నిర్ణయం తీసుకున్నామని సర్వోన్నత న్యాయస్థానం తెలిపింది.

శబరిమల అయ్యప్ప ఆలయ నిబంధనల ప్రకారం 10 నుంచి 50 సంవత్సరాలలోపు మహిళలకు స్వామి దర్శనానికి అనుమతిలేదు. ఇది మహిళలకు రాజ్యాంగ కల్పించిన హక్కులను కాలరాయడమేనని, దాదాపు లింగవివక్షత లాంటిదేనని భావిస్తూ యంగ్ లాయర్స్ అసోసియేషన్ అనే స్వచ్ఛంద సంస్థ సుప్రీంకోర్టులో ప్రజా ప్రయోజనాల వ్యాజ్యం దాఖలు చేసింది. అయ్యప్ప దేవాలయంలో లింగ వివక్ష అమలవుతోందని, దీనిని నివారించాలని పిటిషన్‌లో కోరింది. దీనిని విచారణకు స్వీకరించిన సర్వోన్నత న్యాయస్థానం ఆలయంలోకి మహిళలను అనుమతించకపోవడం రాజ్యాంగ విరుద్ధమని జనవరి 2016లో వ్యాఖ్యానించింది. అలాగే గత ఫిబ్రవరిలో ఈ కేసును రాజ్యాంగ ధర్మాసనానికి అప్పగించాలని ఆదేశించింది.

కేసును రాజ్యాంగ ధర్మాసనానికి బదిలీ చేస్తున్నట్లు ప్రకటించడంపై మహిళ హక్కుల కార్యకర్తలు హర్షం వ్యక్తం చేస్తున్నారు. ఈ కేసులో తీర్పు తమకు అనుకూలంగా వస్తుందని భావిస్తున్నారు. ఇటీవల పలు కేసుల్లో సుప్రీంకోర్టు గొప్ప ప్రగతిశీలమైన తీర్పులను వెల్లడించిందని, ఈ విషయంలోనూ తమకు అనుకూలంగా తీర్పు వస్తుందని ఆశిస్తున్నామని మహిళ హక్కుల కార్యకర్త బృంద‌ అడిగ వ్యాఖ్యానించారు. సుప్రీం తీర్పుతో శబరిమల ఆలయంలోకి మహిళకు ఆటంకంగా ఉన్న నిబంధనలు తొలిగి, స్వామిని దర్శించుకునే అదృష్ట‌ం తమకు దక్కుతుందని భావిస్తున్నామని మరో హక్కుల కార్యకర్త సరస్వతి ఘోష్ అన్నారు.