Chandra Grahanam Effects on Rasi: సంపూర్ణ చంద్రగ్రహణం.. ఏ రాశివారిపై ఎలాంటి ప్రభావం?

భారత కాలమానం ప్రకారం చంద్రగ్రహణం జనవరి 21న ఉదయం 8.06 గంటలకు ప్రారంభమై మధ్యాహ్నం 1.18 గంటలతో ముగుస్తోంది. ఉదయం 10.42 గంటలకు చంద్రగ్రహణం అత్యధిక స్థాయిలో కనిపిస్తుంది. మొత్తం గ్రహణ కాల సమయం 5 గంటల 9 నిమిషాల 28 సెకెన్లు. ఇక సంపూర్ణ చంద్రగ్రహణం ఉదయం 10 గంటల 11 నిమిషాల 17 సెకెన్లకు మొదలై 11 గంటల 13 నిమిషాల 15 సెకెన్లకు పూర్తవుతుంది. అంటే మొత్తం 61 నిమిషాల 17 సెకెన్ల పాటు సంపూర్ణ చంద్రగ్రహణం ఉంటుంది. పుష్య మాసంలో శుక్లపక్ష పౌర్ణమి సోమవారం ఏర్పడుతోన్న ఈ సంపూర్ణ చంద్ర గ్రహణం భారత దేశంలో కనిపించడం లేదు. దీనిని సూపర్ బ్లడ్ మూన్ అని ప్రచారం చేయడంతో దీనిని ప్రపంచమంతా ఆసక్తిగా చూస్తున్నారు.

సంపూర్ణ చంద్ర గ్రహణ ప్రభావం భారత్‌లో ఉండదు కాబట్టి, పెద్దగా ఆందోళన చెందాల్సిన అవసరం లేదు. అయితే ఇది దక్షిణ అమెరికా, యూరప్,ఆఫ్రికా దేశాలలో కన్పిస్తుంది. ఈ చంద్ర గ్రహణాన్ని రాహు గ్రస్త చంద్ర గ్రహణం అని పండితులు పేర్కొంటున్నారు. గ్రహణం అనగానే చాలా మంది భయపడతారు. ఏమైనా పరిహారాలు చేసుకోవాలా? గ్రహణ నియమాలు పాటించాలా? గర్భిణీలు జాగ్రత్తగా ఉండాలా? అనే సందేహాలు కలుగుతాయి. ప్రస్తుతం ఏర్పడుతోన్న చంద్ర గ్రహణం పుష్యమి నక్షత్రం, కర్కాటక రాశిలో ఏర్పడుతుంది. భారత కాలమానం ప్రకారం ఉదయం 8 గంటల నుంచి మధ్యాహ్నం 1 గంట వరకు ఉంటుంది. చంద్రుడు మనస్సు మీద ప్రభావం చూపుతాడు. కాబట్టి ఈ చంద్ర గ్రహణం సమయంలో సింహా, కర్కాటక రాశి వారు శివభిషేకాలు చేయించుకోవడం మంచిది.

భారత దేశంలో కనిపించకపోయిన మనః కారకుడు చంద్రుడు కాబట్టి మానసిక ఒత్తిడి లేకుండా మనస్సు ప్రశాంతంగా ఉండాలంటే పరిహారం చేయాలి. అలాగే గ్రహణ పట్టు, విడుపు స్నానం చేయాల్సిన అవసరం లేదు. గర్భవతులు కూడా కదలకుండా కూర్చోవాలనే నియమాలు పాటించాల్సిన పనిలేదు కర్కాటక రాశిలో గ్రహణం ఏర్పడుతుంది.. కాబట్టి కర్కాటకంతోపాటు ఆ రాశికి ముందు వెనుక ఉండే మిథున, సింహా రాశివారు కూడా జనవరి 22న శివుడికి అభిషేకం చేయిస్తే మంచిది. ఒకవేళ అభిషేకం చేయడం కుదరకపోతే ఓం నమశ్శివాయ మంత్రాన్ని 11 లేదా 108 సార్లు పఠిస్తే గ్రహణం ప్రభావం తగ్గుతుంది. అలాగే ఈ మంత్రాన్ని గ్రహణ సమయంలో పఠిస్తే వెయ్యి రేట్లు ఫలితం ఉంటుంది.