నేడు ఆది అమావాస్య.. పితృదేవతలకు తర్పణం వదిలితే అద్భుత ప్రయోజనాలు

నేటితో (శనివారం) ఆషాఢ మాసం ముగియడంతోపాటు అమావాస్య, సూర్యగ్రహణం కూడా. ఈ అమావాస్యను ఆది అమావాస్యగా జరుపుకుంటారు. పితృదేవతలకు తర్పణం వదలడానికి ముఖ్యమైన రోజుగా ఆది అమావాస్యను భావిస్తారు. పితృదేవతల ఆశీస్సులు మనకు లేకపోతే... జీవితంలో రాణించలేమని పండితులు చెబుతుంటారు. వారిని పూజించి సంతృప్తి పర్చడం ద్వారా మెరుగైన ఫలితాలను పొందొచ్చు. ఈ రోజున పితృదేవతలకు తర్పణం వదలడం ద్వారా వారి ఆత్మలు సంతృప్తి చెంది మనల్ని ఆశీర్వదిస్తాయి. దీంతో జీవితంలో చెప్పుకోదగ్గ పురోగతి సాధించొచ్చు.

ఈ రోజు సూర్య, చంద్రులిద్దరూ కర్కాటక రాశిలోకి ఒకేసారి వస్తారు. అందుకే దీన్ని ఆది అమావాస్య అంటారు. సూర్యుడితో చంద్రుడు కలిసి వచ్చిన ఈ రోజున తర్పణం వదలడం వల్ల ఆత్మలు ఊర్ధ్వలోకాలకు వెళ్తాయని నమ్ముతారు. ఆది అమావాస్యను తమిళనాడు, ఉత్తర భారతంలోని కొన్ని ప్రాంతాల్లో ఎక్కువగా జరుపుకుంటారు.
ఆది అమావాస్య సందర్భంగా రామేశ్వరంలో తర్పణం వదలడం, నువ్వులతో హోమం చేయడం శుభప్రదమని నమ్ముతారు. ఇలా చేయడం వల్ల ఆరోగ్య, ఆర్థిక సమస్యలు తగ్గి, సంబంధాలు మెరుగవుతాయని భావిస్తారు. అందుకే తర్పణాలు వదిలేందుకు పెద్ద సంఖ్యలో జనాలు రామేశ్వరం చేరుకున్నారు. అక్కడి అగ్ని తీర్థంలో స్నానాలు చేసి పెద్దలు తర్పణాలు వదిలారు.
ఆది అమావాస్య రోజున ఆవులకు పాలకూర తినిపించడం, ఆకలితో అలమటిస్తున్న వారికి అన్నదానం చేయడం మెరుగైన ఫలితాలను ఇస్తాయి. ఆవులకు ఆహారం తినిపించడం వల్ల పితృదేవతల ఆత్మలకు విముక్తి లభిస్తుందని నమ్ముతారు.